४ असार २०८०, सोमबार
४ असार, काठमाडाैँ । नेपाल माहात्म्यमा वर्णन भएअनुसार उपत्यकाका चार बाराहीमध्येको एक श्वेत बाराही मन्दिर क्षेत्रमा जाने बाटो ढलानसहित सिँढीको निर्माण सम्पन्न भएको छ । गोकर्णेश्वर नगरपालिका–१ मा अवस्थित बागमती प्रदेश सरकारको रु दुई करोड १० लाखको आर्थिक सहयोगमा बाटो ढलान र सिँढी निर्माण सम्पन्न भएको हो ।
ढलान बाटो र सिँढीको उद्घाटन गर्नुहुँदै बागमती प्रदेश सरकारका पूर्वमन्त्री रामेश्वर फुँयालले अन्तर्राष्ट्रिय पशुपति परिपथ र बौद्ध परिपथ निर्माणका लागि स्थानीय मठ मन्दिरलाई एकीकृत गरी धार्मिक परिपथ बनाउन प्रदेश सरकारले प्रयास गरेको बताए । समाजमा असल काम स्थापित गर्न स्रोत, साधन र सम्पदाको बहुमुखी प्रयोग गर्न आवश्यक रहेको स्थानीयवासीको भनाइ थियो । गोकर्णेश्वर नगरपालिकाका उपप्रमुख सान्नानी लामाले नगरपालिकाभित्र रहेका धार्मिक ऐतिहासिक स्थललाई धार्मिक पर्यटकीय स्थलका रूपमा विकास गरिने बताए । उत्तर गयाका रूपमा परिचित गोकर्णेश्वर मन्दिरलाई विश्व सम्पदा सूचीमा सूचीकृत गर्न प्रयास भइरहेको उनले जानकारी दिए ।
वडा नं १ का अध्यक्ष द्वारिका श्रेष्ठ, धार्मिक समितिका सदस्य दामोदर खनाल, स्थानीयवासी बालकृष्ण श्रेष्ठलगायतले ऐतिहासिक, स्रोत साधनको उपयोगमा ध्यान दिन र काठमाडौँ उपत्यकालाई सहजसँग हेर्न सकिने प्राकृतिक रमणीय स्थल श्वेत बाराही मन्दिरलाई धामको रूपमा विकास गर्न आवश्यक रहेकोमा जोड दिए ।
प्रकाशित मिति: ४ असार २०८०, सोमबार
