२१ जेष्ठ २०८०, आईतवार
२१ जेठ, सिन्धुली । सिन्धुलीको गोलन्जोर गाँउपालिका–७ लौकुनमा दुई दिनअघि सुनकोसी नदीमा जीप खस्दा वेपत्ता भएका सीटीइभीटीका तीन कर्मचारीको खोजी कार्य जारी छ ।
सशस्त्र प्रहरीको दुई वटा गोताखोर टोली, नेपाली सेनाको एउटा गोताखोर टोली र जनपथ प्रहरीको विपद् व्यवस्थापन गरी चार वटा टोली आईतबारदेखि परिचालन गरी खोजी कार्यलाई तीव्र बनाएको जिल्ला प्रहरी कार्यालय सिन्धुलीले जनाएको छ ।
कार्यालयका अनुसार गोलन्जोर गाँउपालिका–७ लौकुनमा शुक्रबार दिउँसो प्राविधिक शिक्षा तथा व्यवसायिक तालिम परिषद् (सीटीइभीटी)को बा १ झ ७४६७ नम्बरको जीप सुनकोसी नदीमा खस्दा गाडीमा सवार चार जनामध्ये तीन जना वेपत्ता भएका थिए ।
वेपत्ता हुनेमा सीटीईभीटी प्रशासन शाखाका निर्देशक ५७ वर्षीय कृष्णबहादुर केसी, योजना महाशाखा निर्देशक ५६ वर्षीय यमप्रसाद भुर्तेल र ३२ वर्षीय विद्युत प्राविधिक अधिकृत भानु पौडेल छन् । गाडीका चालक ३१ वर्षीय कृष्ण चौधरी पौडी खेलेर बाहिर निस्किएको र उनको शुभ जीवन अस्पताल खुर्कोटमा उपचार भइरहेको छ ।
वेपत्ताको खोजीमा शनिबारसम्म सशस्त्र प्रहरीको उपत्यका गोताखोर टोली परिचालन भएको थियो । आईतबारदेखि सशस्त्र प्रहरीकै कुरिनटार गोताखोर टोली, नेपाली सेनाको सुन्दरीजल गोताखोर टोली र जनपथ प्रहरीको विपद् व्यवस्थापन टोली पनि थपेर चार टोली परिचालन गरिएको सिन्धुलीका एसपी राजकुमार सिलवालले जानकारी दिए । उनले भने, “खोजी कार्यलाई तीव्र बनाएका छौं । वेपत्ता हुनुभएकाहरु फेला पर्न सक्नुभएको छैन ।”
खोजी गर्न चार वटा टोली परिचालन गरिएकोले वेपत्ता भएकाहरु फेला पर्नसक्ने उनकाे आशा छ । उनका अनुसार जीप खसेको ठाँउ सुनकोसी नदीमा पानीको बहाव धेरै र गहिरो भएकोले खोजी गर्न गाह्रो भएको हो ।
जीप खसेको भित्तामा सुनकोसी नदी पनि ठोकिएकोले सुरुङ बनेको हुनसक्ने र जीप त्यही सुरुङभित्र पसेको पनि हुनसक्ने अनुमान गरिएको छ ।
सुनकोसीको पानीको बहाव समेत अर्को तर्फबाट कटाउन शनिबारबाटै तीन वटा स्काभेटर मेसिन प्रयोग गरिएको छ । अहिलेसम्म २५ प्रतिशत पानी अर्को तर्फबाट कटाइएको छ । आधा पानी अर्कोतर्फ फर्काएर करेन्ट प्रवाह घटाई खोजी कार्यलाई सहज बनाउने प्रयास गरिएको छ ।
धमिलो पानी भएकाले नदीको भुईसम्म नदेखिँदा खोजीमा समस्या भएको एसपी सिलवालको भनाइ छ । “गहराइमा पुग्दा समेत केही देखिदैन,” उनले भने, “पानी सङ्ग्लो भई दिएको भए यति ठूलो समस्या हुने थिएन ।”
प्रकाशित मिति: २१ जेष्ठ २०८०, आईतवार
