२० जेष्ठ २०८०, शनिबार
२० जेठ, काठमाडाैँ । नेकपा (एमाले) का अध्यक्ष एवं पूर्व प्रधानमन्त्री केपी शर्मा ओलीले पार्टी सरकारबाट हटेपछि ‘समृद्ध नेपाल’ बनाउने आँट कसैले पनि गर्न नसकेको बताएका छन् । अध्यक्ष ओलीले आफ्नो पार्टी सरकारबाट हटेपछि ‘समृद्ध नेपालः सुःखी नेपाली’ को नारा कसैले लगाउन नसकेको बताए । पार्टीको विज्ञान तथा प्रविधि विभागले शनिबार च्यासलस्थित पार्टी केन्द्रीय कार्यालयमा आयोजना गरेको कार्यक्रममा उनले सो कुरा बताएका हुन् ।
कुनै व्यक्ति नभई सिङ्गो समाजलाई माथि उठाउन आफूहरुले समृद्धिको एजेण्डालाई अघि बढाएको उनको तर्क छ । ढिलो होइन, छिटो विकास गर्न आफूहरुले समृद्धिको एजेण्डालाई अघि बढाएको उनको दाबी छ । उनले भने, ‘हामी सरकारबाट हटेपछि समृद्ध नेपालः सुखी नेपाली नारा कुनै सरकार, कुनै प्रधानमन्त्री, कुनै नेताले उठाउन सकेन ।’
एमालेले समाज र मानवको विकास गर्ने अभियानमा रहेको उनको भनाइ छ । मानव समाजका लागि बस्न लायकको उत्तरदायी, भविष्यप्रति जिम्मेवार, विनाशकारी होइन, जिम्मेवार विकासको खाँचो रहेको र त्यो एमाले नेतृत्वको सरकारले मात्र गर्न सक्ने उनको जिकिर छ ।
प्रकाशित मिति: २० जेष्ठ २०८०, शनिबार
