९ जेष्ठ २०८०, मंगलवार
९ जेठ, राैतहट । माछापुच्छ्रे बैंकको खाताबाटै एक जनाको लाखाैँ रूपैयाँ गायब भएको छ । रौतहटको वृन्दावन नगरपालिका ३ का रामेश्वर राय यादवको माछापुच्छ्रे बैंकमा रहेको खाताबाट पैसा हराएको देखिएको हो ।
यादवका अनुसार उनको खातामा १२ लाख २० हजार रूपैयाँ थियो । तर, अहिले उनको खाताबाट ९ लाख रूपैयाँ भने हराएको छ ।
उनले गत शुक्रबार माछापुच्छ्रे बैंकको खाता नम्बर ७५००६५३८२८०००१४ मा १२ लाख २० हजारको चेक क्लिरियन्सका लागि दिएका थिए । उनले यसको जानकारी मोबाइलमार्फत पाएका थिए ।
तर, आइतबार ८ लाखको चेक साट्न जाँदा भने उनको खाताबाट ९ लाख निकालिसकेको पाइएपछि उनी त्रसित भएका छन् । उनी खाताबाट पैसा हराएको सुनेपछि बेहोस नै भएका थिए ।
बैंकका शाखाप्रमुखले भने उनको गुनासोमा कुनै जिम्मेवारी नै नदेखिएको बताइएको छ । उनले खाताबाट पैसा हराएको गुनासो गर्दा ह्याकरले लगेको र केही गर्न नसकिने भन्दै जिम्मेवारीबाट पन्छिरहेका छन् ।
एक समाचारपत्रका अनुसार यादवको खाताबाट ९८६०१०१०२२, ९८०१५३३५४२, ९८२५०७४४०० र ९८२४२५५६३१ नम्बरको मोबाइल प्रयोग गरी रकम निकाले देखिएको छ । बैंकले स्टेटमेन्ट समेत दिन नमानेपछि यो प्रकरणमा बैंककै कर्मचारीको मिलेमतो भएको समेत उनले शंका गरेका छन् ।
यो घटनाबारे प्रहरीलाई खबर गरिएको छ । प्रहरिले यस विषयमा अनुसन्धान गरिरहेको बताइएको छ ।
प्रकाशित मिति: ९ जेष्ठ २०८०, मंगलवार
