२५ बैशाख २०८०, सोमबार
२५ वैशाख, कालीकोट । कालीकोट जिल्लाको पलाँता गाउँपालिका–६ सैनका ३१ वर्षीय शंङ्क बुढालाई पक्राउ गर्न गएको प्रहरी माथि गाउँलेले आक्रमण गरेका छन् । बलात्कारको आरोप लागेका फरार बुढालाई पक्राउ गर्न जाँदा गाउँले प्रहरी र पीडित परिवार माथि आक्रमण गरेका हुन्।
सोमबार बिहान साढे ६ बजेतिर बुढालाई प्रहरीले हत्कडी लगाएर सदरमुकाम मान्म ल्याउने क्रममा स्थानीयले प्रहरीसँगै पीडित महिलाका परिवारमाथि आक्रमण गरेका थिए । घटनास्थलमै पुगेका जिल्ला प्रहरी कार्यालय, कालीकोटका प्रहरी निरीक्षक यज्ञराज जोसिले गाउँलेहरूको आक्रमणबाट प्रहरी सहायक निरीक्षक लक्ष्मीरुद्र रावल र पीडित परिवारका वडा नं ५ धनमल विक गम्भीर घाइते भएको जानकारी दिएका छन् । घाइते विकको अहिले स्थानीय स्वास्थ्य चौकीमा उपचार भइरहेको छ ।
घाइतेहरू दुवै जनाको टाउकोमा गहिरो चोट लागेका कारण अहिले उनिहरूको अवस्था गम्भीर रहेको प्रहरीले जानकारी दिएको छ । घाइते दुवै जनालाई हेलिकोप्टरमार्फत उद्धारको तयारी भइरहेको छ । प्रहरीका अनुसार बुढाले २०७९ असोज ३१ गते गाउँकै एक दलित महिलामाथि बलात्कार गरेका थिए ।
पीडित परिवारले कात्तिक ९ गते जिल्ला प्रहरी कार्यालयमा किटानी जाहेरी दिएको थियो । जिल्ला अदालत कालीकोटले २०७९ कार्तिक १४ गते पक्राउ पुर्जी नै जारी गरेको थियो । त्यसयता फरार रहेका बुढा आफ्नै घरमा लुकिछिपी बसेको भन्ने गोप्य सूचनाका आधारमा सोमबार बिहान ४ बजे उनलाई पक्राउ गर्न प्रहरी चौकी करदेवबाट चार जना प्रहरी टोली गएको थियो । प्रहरी पुग्दा घरमै सुतिरहेका बुढालाई प्रहरीले हत्कडी लगाएर जिल्लातर्फ ल्याउने क्रममा गाउँलेले आक्रमण गरेका थिए ।
स्थानीय मानिसहरू जम्मा भएर प्रहरी र पीडितमाथि आक्रमण गर्दा आरोपी बुढा हत्कडीसहित फरार भएका छन् । आरोपी बुढाको खोजी लागि जिल्ला प्रहरी कार्यालयबाट प्रहरी निरीक्षक यज्ञराज जोशीको टोली र नजिकका प्रहरी चौकीबाट थप टोली पलाँता खटाइएको जिल्ला प्रहरी कार्यालय कालीकोटले जानकारी दिएको छ ।
प्रकाशित मिति: २५ बैशाख २०८०, सोमबार
