१४ बैशाख २०८०, बिहीबार
१४ वैशाख ,इनरुवा । सुनसरीमा वैदेशिक रोजगारीको शिलसिलामा ठगीमा परेका परिवारलाई छ करोड क्षतिपूर्ति वापतको रकम पीडित परिवारलाई उपलब्ध गराइएको छ ।
पीडित परिवारले दिएको उजुरीका आधारमा सुनसरीमा वैदेशिक रोजगारीका क्रममा ठगीमा परेका पीडित परिवारलाई चार वर्षमा रु छ करोडभन्दा बढी रकम क्षतिपूर्ति वापत उपलब्ध गराइएको हो ।
वैदेशिक रोजगारका नाममा पीडित भएकाले सुरक्षित आप्रवासन (सामी) कार्यक्रम सुनसरीमार्फत क्षतिपूर्ति वापतको रकम पाएको सामीका सुनसरी कार्यक्रम संयोजक धीरज भट्टराईले जानकारी दिए ।
आप्रवासी स्रोत केन्द्र र अन्य निकायको समन्वयमा जिल्लाका पीडितले २०७६ देखि हालसम्म चार वर्षमा रु छ करोड ४० लाख ३५ हजार पाँच सय क्षतिपूर्ति वापत रकम प्राप्त गरेको सुरक्षित आप्रवासन (सामी) का कार्यक्रम संयोजक भट्टराईले जानकारी दिए ।
जिल्ला प्रशासन कार्यालयमा रहेको आप्रवासी स्रोत केन्द्र र प्रहरीको सहयोगमा रु ७२ लाख ५७ हजार पाँच सय, श्रम कार्यालय प्रदेशको सहयोगमा तीन लाख ३० हजार, पिपुल फोरमको सहयोगमा एक लाख र मृत्युसम्बन्धी क्षतिपूर्ति रु पाँच करोड ६३ लाख ४९ हजारसहित अन्य निकायको समन्वयमा रु छ करोड ४० लाख ३५ हजार पाँच सय क्षतिपूर्ति वापत रकम पाएको उनले बताए ।
सामीले आव २०७६/२०७७ देखि चालु आवसम्म सुनसरीबाट सामीमा परामर्श लिएर विदेश जाने १७ हजार नौ सय पुरुष र तीन हजार आठ सय ५५ महिला गरी २१ हजार सात सय ५५ रहेको उनले बताए । सामीले एक सय २९ पुरुष र ८७ महिलालाई निःशुल्क रुपमा सीपमूलक तालिम दिएको उनले बताए । सामीले यो तथ्याङ्क श्रम, रोजगार तथा सामाजिक सुरक्षा मन्त्रालयको तथ्याङ्कमा आधारित भएको जनाएको छ ।
प्रकाशित मिति: १४ बैशाख २०८०, बिहीबार
