९ बैशाख २०८०, शनिबार
९ वैशाख ,मोरङ । बबरसिंह–देवकुमारी थापा सेवा गुठी विराटनगरले आज यहाँ दुई जना स्रष्टालाई सम्मान गरेको छ । यसरी सम्मानित हुनेमा विसं २०५३ को मदन पुरस्कार प्राप्त गर्ने समालोचक प्रा डा दयाराम श्रेष्ठ र सङ्गीतकरा कुशेश्वर राई हुन्।
देवकुमारी थापा स्मृति विसं २०७९ बाट प्रा डा श्रेष्ठलाई रु ५१ हजार र बबरसिंह थापा स्मृति सम्मान २०७९ बाट राईलाई नगद रु २५ हजार एवं सम्मानपत्रबाट सम्मान गरिएको छ ।
कोशी प्रदेशका सामाजिक विकासमन्त्री बुद्धिकुमार राजण्डारीले स्रष्टालाई सम्मान गर्दै साहित्यकार र साहित्य मुलुकको सम्पत्ति भएकाले यसको संस्थागत विकास एवं संरक्षण गरिने बताए । उनले यो प्रदेश विभिन्न जातजाति बसोबास गर्ने एउटा फूलबारी भएकाले साझा पहिचानका आधारमा कोशी प्रदेश नामकरण गरिएको बताए ।
मन्त्री राजभण्डारीले पहिचानवादीले विरोधको कार्यक्रम गर्दा शान्तिपूर्ण गर्न आग्रह गर्दै आगामी दिनमा हुने निर्वाचनमा प्राप्त गरिने दुईतिहाइ मतका आधारमा संवैधानिक र कानुनी प्रकियाद्वारा प्रदेशको नाम परिवर्तन सकिने धारणा राखे ।
सम्मानित स्रष्टा प्रा डा श्रेष्ठले आगामी दिनमा ‘खुकुरी र सगरमाथा’का विषयमा व्यापक अनुसन्धान गरी पुस्तक प्रकाशन गर्ने उद्देश्यले कार्यप्रारम्भ गरिरहेको जानकारी दिए । गुठीका अध्यक्ष कविराज न्यौपाने, साहित्यकार प्रमोद प्रधान, दधिराज सुवेदी, विवश पोखरेल, दिनेश सुवेदी र हरिमोहन श्रेष्ठले साहित्य, कला एवं संस्कृतिको विकासबाट मुलुकको समृद्धि झल्किने धारणा राखे ।
सोही अवसरमा मन्त्री राजभण्डारीले प्र्रमोद प्रधानले सम्पादन गर्नुभएको ‘देवकुमारी थापाका समग्र कथा’ पुस्तकको विमोचन गरे ।
प्रकाशित मिति: ९ बैशाख २०८०, शनिबार
