७ बैशाख २०८०, बिहीबार
७ वैशाख ,काठमाडौँ । यही वैशाख १२ देखि १५ गतेसम्म काठमाडौँमा अन्तर्राष्ट्रिय गृह श्रमिक सम्मेलन हुने भएको छ । होमनेट इन्टरनेशनलको आयोजनामा हुन लागेको उक्त सम्मेलनमा ३९ वटा देशका करिब दुई सय श्रमिकको सहभागिता रहने आयोजक संस्थाले जानकारी दिएको छ ।
होमनेट साउथ एसियाको क्षेत्रीय संयोजक सृष्टि जोशी मल्लले अनुसार कार्यक्रममा दक्षिण एसिया, अफ्रिका र ल्याटिन अमेरिकाभित्रका २९ देशका दुई सय गृह श्रमिकले सहभागिता जनाउने जानकारी दिईन । चार दिनसम्म चल्ने सम्मेलनमा गृह श्रमिकबाट उत्पादन भएका सामानको स्टल राखी प्रदर्शनी र बिक्री गरिनेछ ।
कार्यक्रममा सदस्य सङ्घसंस्था, युनियन, भ्रातृ सङ्गठन, सामूहिक र उद्यमका प्रतिनिधि सदस्यलगायतको उपस्थिति रहने संयोजक मल्लले जानकारी दिईन। सम्मेलनमा गृह श्रमिकले गरेका कार्य प्रस्तुत हुनेछ ।
फोटो प्रदर्शनीमार्फत गृह श्रमिकको योगदानको प्रदर्शन गरिने छ । गृह श्रमिकको उद्यमले हस्तकला र हस्तनिर्मित उत्पादन प्रोत्साहित हुने र कार्यक्रमले दृष्टिकोण र समान प्रतिनिधित्व, सहभागिता र मार्गदर्शन सुनिश्चित गर्न मद्दत गर्ने आयोजक संस्थाले विश्वास लिएको छ ।
होमनेट साउथ एसिया दक्षिण एसियाभरका गृह श्रमिक सङ्गठनको नेटवर्क हो । दक्षिण एसियाली क्षेत्रका जोखिममा रहेका १२ लाखभन्दा बढी गृह श्रमिकको प्रतिनिधित्व संस्थाले गर्दै आएको छ । तीमध्ये ९५ प्रतिशत गृह श्रमिक महिला र पाँच प्रतिशत पुरुष यस संस्थामा आबद्ध रहेका छन् ।
चारदिने कार्यक्रम विशेषगरी विभिन्न देशबाट आएका गृह श्रमिकलाई नेपाली गृह श्रमिकको विभिन्न संस्थाको स्थलगत अवलोकन गराउने आयोजक संस्थाले जानकारी दिएको छ । काठमाडौँ उपत्यकामा गृह श्रमिकको सङ््गठित संस्था छवटा रहेका छन् ।
नेपालमा सङ्गठितरूपमा कार्यरत रहेका यी संस्थाले विशेषगरी माटोका भाडाँकुँडा, ढाकाका कपडा, बालबालिकाले खेल्ने विभिन्न सामग्री, हातले बुनेर लगाउने कपडासहित खाद्य सामग्री पनि उत्पादन गर्दै आएका छन् । कार्यक्रममा गृह श्रमिकको अनुभव र सीप भोगाइ र सफलताको कथा एक आपसमा आदानप्रदान हुनेछ ।
सन् २००० मा काठमाडौँ घोषणापत्र जारी गर्दै यस संस्थाले आफ्नो यात्रा सुरुआत गरेको थियो । गृह श्रमिक, सम्बन्ध भएका अन्य व्यक्ति र अन्य सहयोगीसँग मिलेर आगामी वर्षका लागि दृष्टिकोण र समान प्रतिनिधित्व, सहभागिता र मार्गदर्शन सुनिश्चित गर्न वार्षिक योजना तयार गर्ने काम गरिरहेको पनि संयोजक मल्लले भनिन ।
प्रकाशित मिति: ७ बैशाख २०८०, बिहीबार
