७ बैशाख २०८०, बिहीबार
७ वैशाख, काठमाडाैँ । बेलायत सरकारले भर्ती गर्ने गोर्खा सैनिकहरूको मागका बारेमा संयुक्त अधिराज्यको रक्षा मन्त्रालयमा तेस्रो पटक बैठक सम्पन्न भएको छ । बुधवार संयुक्त अधिराज्यको रक्षा मन्त्रालयमा मिनिस्टर फर डिफेन्स पिपुल भेटेरन्स एण्ड सर्भिस फेमिलिस माननीय एन्ड्रअ मुरिसोन एमडी एमपी र संयुक्त अधिराज्यका लागि नेपाली राजदूत महामहिम ज्ञानचन्द्र आचार्यबीच भूपू गोर्खाहरूको माग सम्बोधनका विषयमा गठित द्विपक्षीय समितिको बैठक सम्पन्न भएको हो ।
बैठकमा विशेष यस अघि भएको समितिको पहिलो बैठक तथा प्राविधिक तहमा भएको छलफलका आधारमा पेन्सन एवं कल्याणकारी सुविधाहरूका बारेमा भएको प्रगतिको समीक्षा भएको राजदूत आचार्यले जानकारी दिए ।
यस अघि प्राविधिक तहमा छलफल गर्न बाँकी केही विषयहरूमा पुनः प्राविधिक तहको बैठक र सेप्टेम्बर महिनामा द्विपक्षीय समितिको अर्को बैठक बस्ने तय भएको छ। राजदूत आचार्यले नेपाल र संयुक्त अधिराज्यबीच रही आएको ऐतिहासिक सम्बन्धलाई दृष्टिगत गर्दै यसको आधार स्तम्भको रूपमा रहेका भूपू गोर्खाका मागहरूका विषयमा दीर्घकालीन समाधानका लागि पहल गर्न रक्षा राज्यमन्त्रीलाई अनुरोध गर्नुभएको थियो ।
बैठकमा परराष्ट्र मन्त्रालयका युरोप अमेरिका महाशाखा प्रमुख श्री दिलीप पौडेलले पनि नेपाल सरकारको तर्फबाट भूपू गोर्खाहरूको माग सम्बोधनका विषयमा आफ्नो विचार राखेका थिए । भूपू गोर्खाहरूको तर्फबाट जुद्धबहादुर गुरुङले सम्बोधन हुन बाँकी सबै मागहरूका विषयमा विस्तृतमा आफ्नो धारणा राख्नुभएको थियो । बैठकमा नेपाली राजदूतावासका उप–नियोग प्रमुख रोशन खनाल, सैनिक सहचारी महासेनानी रत्नबहादुर गोदार तथा भूतपूर्व गोर्खाहरूको तर्फबाट धर्मबहादुर तामाङ, कृष्णबहादुर राई तथा बेलायत सरकारको तर्फबाट रक्षा मन्त्रालय र अन्तर्गतका अधिकारीहरूको सहभागिता थियो।
प्रकाशित मिति: ७ बैशाख २०८०, बिहीबार
