५ बैशाख २०८०, मंगलवार
५ वैशाख, सर्लाही । फोहोर फाल्ने ठाउँमा ठूलो परिमाणमा नक्कली नोट फेला परेका छन् ।
सर्लाहीको लालबन्दी नगरपालिका –७, बजारस्थित पुरानो गोल्डेन फ्यूचर आवासीय विद्यालय रहेको भवनको पछाडिपट्टी फोहोर फाल्ने ठाउँमा फ्याँकिएको अवस्थामा नक्कली नोट बरामद गरिएको हो ।
प्रहरी कार्यालय लालबन्दीले दिएको जानकारी अनुसार उक्त ठाउँबाट एक हजारका ५३० वटा नक्कली नोट बरामद गरिएको छ । त्यस्तै, सोही स्थानमा ५०० भन्दा बढी फोटोकपी पेपर समेत फेला परेको छ ।
नक्कली नोट बनाउने कार्यमा संलग्न व्यक्तिले बजारमा ती नोट प्रयोग गर्न नसकेपछि फोहोर फाल्ने ठाउँमा ल्याएर फालेको हुनसक्ने आशङ्का गरिएको छ ।
प्रहरीले नक्कली नोट कसले फाल्यो भनेर पत्ता लगाउन अनुसन्धान सुरू गरेको जानकारी दिएको छ ।
प्रकाशित मिति: ५ बैशाख २०८०, मंगलवार
