१७ कार्तिक २०८३, मंगलवार
काठमाडौँ । विराटनगर किंग्सका अलराउण्डर आन्द्रे रसेलले नेपालमा क्रिकेटको प्रतिभा र खेलाडीहरूको क्षमताबाट आफू प्रभावित भएको बताएका छन् ।
उनले नेपाल प्रिमियर लिग (एनपीएल) ले नेपाली क्रिकेटको प्रतिभा विकासमा महत्वपूर्ण भुमिका खेलिरहेको उल्लेख गर्दै आगामी वर्ष पनि प्रतियोगितामा सहभागी हुन आउने बताएका छन् । मंगलवार जनकपुर बोल्ट्ससँगको खेलपछि सञ्चारकर्मीसँग कुरा गर्दै रसेलले नेपालमा १५ देखि २० जनासम्म राष्ट्रिय टोलीमा स्थान बनाउन सक्ने सम्भावना भएका खेलाडी देखेको बताए । राष्ट्रिय टोलीमा नरहेका खेलाडीसमेत अवसरको खोजीमा रहेको उल्लेख गर्दै उनले नेपाली क्रिकेटमा प्रतिभाको कमी नरहेको धारणा राखे । नेपालले वेस्ट इण्डिजजस्ता ठूला टोलीलाई हराउन सक्नुको कारण पनि आफूले एनपीएलमा देखेको प्रतिभाबाट बुझ्न सकेको रसेलको भनाइ छ । उनले खेलाडीलाई सही प्रशिक्षण र मार्गदर्शनसँगै मेहनती तथा विनम्र रहन सुझाव दिए ।
रसेलले नेपाली पिच र खेल परिस्थितिलाई चुनौतीपूर्ण भएपनि आफूलाई नयाँ नभएको बताए । दुई दशकभन्दा बढी समयदेखि अन्तर्राष्ट्रिय तथा विभिन्न फ्रेन्चाइज प्रतियोगिता खेल्दै आएको अनुभवले फरक पिच र परिस्थितिमा आफूलाई अभ्यस्त बनाएको उनको भनाइ थियो । क्यारेबियन क्षेत्रका पिचसँग पनि नेपाली पिचको केही समानता रहेको उनले बताए ।
अन्तिम ओभरमा १३ रन बचाउने जिम्मेवारी पाउँदा आफूले आफ्नो बलिङ क्षमतामा विश्वास गरेको उनले बताए । अन्तिम ओभरमा दुई सेट ब्याटर क्रिजमा रहेकाले दबाब भए पनि १० रन बचाउन सके पर्याप्त हुने विश्वास लिएको उनले सुनाए । अन्तिम बलमा ब्याटरले अपेक्षा नगर्ने किसिमको सर्ट बल प्रयोग गर्ने निर्णय सफल भएको उनको भनाइ थियो ।
ब्याटिङ र बलिङ दुवैमा अनुभव भएकाले ब्याटरले अन्तिम ओभरमा के अपेक्षा गर्छन् भन्ने बुझ्न आफूलाई सहज हुने रसेलले बताए । ब्याटिङ गर्दा बलरले अपनाउन सक्ने रणनीति र परिवर्तनबारे सोच्ने गरेको उल्लेख गर्दै उनले सोही अनुभवले बलिङमा पनि सहयोग पुगेको बताए ।
नेपाली खेलाडीहरूसँगको सम्बन्धबारे रसेलले एनपीएलमा आफूले निकै आत्मीय वातावरण पाएको बताए । नेपाली खेलाडीहरू रमाइलो स्वभावका र मिलनसार रहेको उल्लेख गर्दै उनले विराटनगरको ड्रेसिङ रुम आफूले अनुभव गरेका सबैभन्दा खुसीमध्ये एक भएको बताए । उनले नेपाली खेलाडी लोकशसँग पनि नजिकको सम्बन्ध बनेको र ब्याटिङमा सुरुआत कसरी गर्ने तथा क्रिजमा सेट भएपछि विकेट जोगाएर खेल्ने विषयमा सुझाव दिने गरेको बताए । यसैबीच, टी–२० क्रिकेटमा १० हजार रन पूरा गर्ने लक्ष्य पाँच वर्षअघि नै निर्धारण गरेको रसेलले खुलासा गरे । आफू १० हजार रन पूरा गर्ने पहिलो तिब्र गतिका बलिङ अलराउन्डर बन्न चाहेको बताउँदै उनले ५०० भन्दा बढी टी–२० विकेट र १० हजार रनको लक्ष्य हासिल गर्न चोट, शल्यक्रिया र पुनरागमनका कठिनाइ पार गरेको उल्लेख गरे ।
१० हजार रनको उपलब्धिपछि अब १२ हजार रनको लक्ष्य राख्ने सोच बनाएको उनको भनाइ थियो । आफूले राखेको लक्ष्यले भविष्यका तिब्र गतिका अलराउन्डरलाई अझ ठूलो उपलब्धि हासिल गर्न प्रेरित गर्ने अपेक्षा पनि उनले व्यक्त गरे । प्रतिद्वन्द्वी टोली जनकपुर बोल्ट्सका ब्याटर सैफ हसनको प्रदर्शनको प्रशंसा गर्दै रसेलले अन्तिम ओभरमा उनले आफूलाई दबाबमा राखेको बताए । नजिक पुगेर पनि जित हासिल गर्न नसक्दाको पीडा आफूले धेरैपटक अनुभव गरेकाले सैफको प्रदर्शनको सम्मान गर्ने उनले बताए ।
नेपालको सबैभन्दा मन परेको पक्षबारे सोधिएको प्रश्नमा रसेलले यहाँको प्राकृतिक सौन्दर्य, हिमाल र नेपालीहरूको आतिथ्यको प्रशंसा गरे । आफूले बाल्यकालदेखि सुन्दै आएको सगरमाथा देख्न पाउनु विशेष अनुभव भएको उनले बताए । नेपालमा अझै एक खेल बाँकी रहेकाले आफू तत्काल स्वदेश नफर्किने पनि उनले स्पष्ट पारे ।
यता, जनकपुर बोल्ट्सका खेलाडी सैफ हसनले विराटनगर किंग्ससँगको खेलमा जितको नजिक पुगेर पनि पराजित हुनुपर्दा आफू निराश भएको बताए । उनले खेलमा जित हासिल गर्न सकेको भए टोलीका लागि मात्र नभई व्यक्तिगत रूपमा पनि थप खुशीको क्षण हुने बताए । हसनले आफूले पावरप्लेको अन्तिम चरणदेखि नै निकै मेहनत गरेर खेललाई जिततर्फ लैजाने प्रयास गरेको बताए । तर त्यसको परिणाम टोलीको पक्षमा आउन नसकेको उनको भनाइ छ । विराटनगरसँगको खेल जित्न सकेको भए शीर्ष दुईमा रहँदै प्लेअफमा पुग्ने सम्भावना बलियो हुने हसनले बताए । यद्यपि प्रतियोगितामा अझै धेरै खेल बाँकी रहेकाले टोलीले शीर्ष दुईमा स्थान बनाउने आशा कायमै रहेको उनको भनाइ छ । बंगलादेशका खेलाडीले पछिल्लो समय विभिन्न फ्रेन्चाइज लिगमा खेल्ने अवसर पाइरहेको उल्लेख गर्दै हसनले त्यसले उनीहरूको अनुभव र प्रदर्शनमा सुधार ल्याएको बताए । बंगलादेश क्रिकेट बोर्ड (बीसीबी) ले विदेशी लिगमा खेल्न सहज रूपमा अनापत्ति प्रमाणपत्र (एनओसी) उपलब्ध गराउँदै आएकोमा उनले आभार व्यक्त गरे । उनकाअनुसार बंगलादेशका खेलाडीले अहिले टी–२० फ्रेन्चाइज प्रतियोगितामा नियमित अवसर पाइरहेका छन् । गत वर्ष आफूले पनि टी–१० र ग्लोवल सुपर लिग खेलेको उल्लेख गर्दै उनले फ्रेन्चाइज क्रिकेटको अनुभवले खेलाडीलाई थप परिपक्व बनाएको बताए ।
प्रकाशित मिति: १७ कार्तिक २०८३, मंगलवार
