२७ आश्विन २०८३, मंगलवार
काठमाडौँ। प्रगतिशील लोकतान्त्रिक पार्टीका नेता जनार्दन शर्माले माओवादी आन्दोलनको पुनर्गठन र पुनर्जागरण आवश्यक रहेको बताएका छन् ।
उनले विगतमा जनयुद्धको नेतृत्व गरेको पुस्ताले अब माओवादी आन्दोलनलाई अघि बढाउन नसक्ने जिकिर गरे । आन्दोलनका बाँकी एजेन्डालाई नयाँ पुस्ताले अघि बढाउनुपर्ने उनको भनाइ छ ।उनले माओवादी आन्दोलनका उपलब्धिका रूपमा संविधानमा समेटिएका अधिकारको प्रभावकारी कार्यान्वयन हुन नसकेको उल्लेख गर्दै समानुपातिक प्रतिनिधित्व र समानताको अधिकार कार्यान्वयनमा देखिएका विकृतिप्रति चिन्ता व्यक्त गरे । समयअनुसार विचार विकास गर्दै नयाँ चुनौतीको सामना गर्न नसक्दा माओवादी आन्दोलनमा प्रतिक्रान्तिको अवस्था सिर्जना भएको उनको भनाइ छ ।
बन्दुकको लडाइँ मात्र क्रान्ति नभएको उल्लेख गर्दै उनले संविधानसभा, शान्ति प्रक्रिया र जनताका समस्या समाधानका लागि गरिने संघर्ष पनि क्रान्तिकै निरन्तरता भएको बताए । माओवादी आन्दोलनले जनताका समस्या समाधान गर्ने दिशामा आफूलाई अघि बढाउन नसकेको उनको टिप्पणी छ ।उनले संविधान, लोकतन्त्र, समावेशिता र राष्ट्रियताको संरक्षणका विषयमा गम्भीर भएर सोच्नुपर्ने बेला आएको बताउँदै पछिल्लो राजनीतिक परिस्थितिले प्राप्त उपलब्धिसमेत संकटमा पर्न सक्ने खतरा औँल्याए । उपलब्धिको रक्षा गर्न नयाँ ढंगले राजनीतिक पहल आवश्यक रहेको उनको भनाइ छ ।
उनले भने, ‘जनयुद्धसम्म एउटा बन्दुक लडियो, त्यसपछि संविधान सभामा लडियो, त्यसपछि शान्ति प्रक्रियामा जनताका समस्याहरूको समाधान गर्ने कुराको लडाइँ नै क्रान्ति हुन्थ्यो । त्यतातिर माओवादी आन्दोलनले त्यो दिशा लिन नसक्नु मुख्य समस्या भएको कारणले प्रतिक्रान्ति भयो यो देशमा । अब यो संविधान पनि के हुन्छ, लोकतन्त्र रहन्छ कि रहँदैन ? हाम्रो राष्ट्रियता यतिबेला कति सङ्गीन घडीमा छ, राष्ट्रियता कति खतरामा छ भन्ने कुरा तपाईं हामी सबैले अनुभुत गरेका छौँ । यसको रक्षा हामी गर्न सक्छौँ कि सक्दैनौँ ? संविधान नरहँदा यो लोकतन्त्र नरहँदा यो समावेशिता आदि त्यस्ता कुरा त त्यो अर्कै कुरा भइहाल्यो । कहाँ पुग्ला ? सबैले गम्भीर भएर सोच्नुपर्ने बेला आएको छ । हाम्रा उपलब्धिहरू आज समाप्त हुँदै गर्दा अब फेरि एकपटक नयाँ सिराबाट, नयाँ ढङ्गले, नयाँ पुस्ताले जो राजनीतिक सुझबुझ भएको पुस्ता होस्, नयाँ पुस्ताले माओवादी आन्दोलनलाई पुनर्गठन गर्नुपर्छ । यसको पुनर्जागरण गर्नुपर्छ । माओवादी आन्दोलनका एजेण्डा अहिले पनि बाँकी छन् । त्यो आवश्यकता अहिले पनि छ । त्यसलाई पुनर्गठित गर्नुपर्छ । त्यसमा मैले आफ्नो तर्फबाट सहयोग र योगदान गर्न म तयार छु, तर मेरो शर्त के छ भने नयाँ पुस्ताले आएर यसको नेतृत्व गर्नुपर्छ । यहाँनिर पुस्ताको कुरा आउँदा एउटा कुरा आउँछ, को कति वर्षमा भन्दा सक्षम र असक्षमको कुरा हो, पुस्ताको कुरा गरेको हैन मैले । अब हिजो जनयुद्ध लडेर त्यसको नेतृत्व गरेको जो टिम थियो, त्यो असक्षम भइसक्यो । हामीभन्दा पछिल्लो पुस्ता जो छ, तपाईँहरूले पुनर्गठन गर्नुप¥यो ।’
माओवादी आन्दोलनका एजेन्डा अझै सान्दर्भिक रहेको दाबी गर्दै उनले नयाँ पुस्ताले आन्दोलनको पुनर्गठन र पुनर्जागरण गर्न अघि बढे सहयोग गर्ने बताए । पुस्तान्तरण उमेरमा नभई क्षमता र योग्यतामा आधारित हुनुपर्ने उल्लेख गर्दै उनले राजनीतिक सुझबुझ भएको नयाँ पुस्ताले नेतृत्व लिएर बाँकी एजेन्डा अघि बढाउनुपर्नेमा जोड दिए ।
प्रकाशित मिति: २७ आश्विन २०८३, मंगलवार
