१ भाद्र २०८३, सोमबार
काठमाडौँ।नेकपा (एमाले)की सांसद यशोदाकुमारी बरालले सरकारको निरङ्कुशताविरुद्ध सडकमा उत्रिन विद्यार्थी संगठनहरुलाई आह्वान गरेकी छिन्।
प्रतिनिधि सभाको सोमवारको बैठकमा बोल्दै उनले अपांगता भएका नागरिक र सुत्केरी महिला समेत खाना पकाउने ग्यासका लागि दिनभर लाइनमा बस्नुपर्ने अवस्था रहेको भन्दै सरकारको आलोचना गरेकी छिन्। उनले ग्यास अभावको कारण नागरिकले सास्ती व्यहोर्नुपरेको भएपनि सरकार नागरिकको समस्याप्रति संवेदनशील नभएको आरोप पनि लगाइन् । उनले सरकारमा अलिकति पनि मानवता छैन ? भन्दै प्रश्न समेत गरेकी छिन् ।
उनले भनिन्, ‘अपांगता भएको नागरिक समेत एक ग्यासको लागि दिनभरी लाइनमा बस्नु परेको छ । सरकारमा मानवता छैन । १३ दिनको सुत्केरीले १४ दिनपछि ग्यास पाए भनेर समाचारमा आउँछ । कति दिनसम्म जनतालाई रुवाउने सरकार ? के जनताले नेपालमा बाँच्न नै नपाउने हो ? म विद्यार्थी संगठनलाई आग्रह गर्न चाहान्छु, निरङ्कुश सरकारको विरुद्धमा उठ्नुस् म छु तपाईहरुको साथमा । विद्यार्थी संगठनले खबरदारी नगरेकै कारण सरकारको निरङ्कुशता बढ्यो ।’
उनले सरकारमाथि खबरदारी नपुगेको कारण सरकारको निरङ्कुशता बढ्दै गएको आरोप पनि लगाएकी छिन् ।
प्रकाशित मिति: १ भाद्र २०८३, सोमबार
