वर्तमान सरकार ‘भवितव्य’ को उपजः ओली

काठमाडौँ। नेकपा (एमाले) का अध्यक्ष एवं पूर्वप्रधानमन्त्री केपी शर्मा ओलीले वर्तमान सरकारलाई ‘भवितव्य’ बाट बनेको सरकारको संज्ञा दिएका छन् ।

इलाममा आयोजित लोकतान्त्रिक आदिवासी जनजाति महासंघ, नेपालको केन्द्रिय कमिटी बैठकलाई सम्बोधन गर्दै अध्यक्ष ओलीले सरकारको गठन प्रक्रिया र कार्यशैलीमाथि टिप्पणी गरेका हुन् । सरकार गठनको प्रसङ्गलाई एक बालकले क्यारम बोर्ड खेल्दा संयोगवश गोटी छिरेको घटनासँग तुलना गरेका छन् । उनले मुलुकमा असहज परिस्थिति सिर्जना गरेर वर्तमान सरकार अस्तित्वमा आएको दाबी गरेका छन् । अध्यक्ष ओलीले वर्तमान सरकार गठन भएदेखि नै प्रतिशोधको राजनीतिमा उत्रिएको आरोप लगाएका छन् । आफू लगायत नेपाली काँग्रेसका नेता रमेश लेखक र अन्य नेताहरूलाई विभिन्न समयमा पक्राउ गर्ने तथा झुटा मुद्दा लगाउने कोशिस भइरहेको उनको भनाइ छ । सरकारले लोकतान्त्रिक मूल्यमान्यता विपरित विभिन्न क्षेत्रमाथि अंकुश लगाउन खोजेको टिप्पणी उनको छ ।

अध्यक्ष ओलीले भने, ‘यो भवितव्यको सरकार हो । कहिलेकाहीँ भवितव्यले यस्तो परिणाम दिन्छ, जुन ठूलो खेलाडीको कौशलजस्तो देखिए पनि संयोग मात्र हुन्छ । मैले एउटा बच्चाले पहिलोपटक क्यारम खेल्दा स्ट्राइकरले गोटीमा लागेर पर्खालमा ठोक्किँदै प्वालमा पसेको देखेको थिएँ । उसले जानेर गरेको थिएन तर परिणाम उत्कृष्ट देखियो। यो सरकारको अवस्था पनि त्यस्तै हो । त्यसैले यस्ता घटनाबाट हामी विचलित हुनुपर्ने आवश्यकता छैन । यो देश हामी सबैको हो । हामीले देशको माया गर्नुपर्छ । यस सरकारका उपद्रवबारे धेरै भन्न चाहन्नँ । सरकारले आएलगत्तै प्रतिवन्ध र प्रतिशोधको राजनीति शुरु ग¥यो । मलाई, रमेश लेखकलाई र अन्य नेताहरूलाई गिरफ्तार गरियो, झुटा मुद्दा लगाउने प्रयास गरियो । ट्रेड युनियन, विद्यार्थी, कर्मचारी, शिक्षक र प्राध्यापकमाथि समेत प्रतिवन्ध लगाउने काम भयो। यो सिलसिला अझै जारी छ ।’

सरकारका यस्ता गतिविधिका बाबजुद विचलित नहुन आग्रह गर्दै उनले देशको हित र रक्षाका लागि सबै एकजुट हुनुपर्नेमा जोड दिएका छन् । सरकारले गरिरहेका ‘उपद्रव’ बाट आत्तिनुपर्ने अवस्था नरहेको उल्लेख गर्दै उनले राष्ट्रभक्तिको भावनाका साथ अघि बढ्न कार्यकर्ताहरूलाई निर्देशन दिएका छन् ।