युएनएफपीएका नयाँ प्रतिनिधिले बुझाए ओहदाको प्रमाणपत्र

काठमाडौँ। नेपालका लागि संयुक्त राष्ट्रसङ्घीय जनसङ्ख्या कोष (युएनएफपीए)का नवनियुक्त प्रतिनिधि श्रीराम हरिदासले परराष्ट्रमन्त्री शिशिर खनाल समक्ष आफ्नो ओहदाको प्रमाणपत्र पेश गरेका छन् ।

युएनएफपीएका नवनियुक्त प्रतिनिधि हरिदासले मङ्गलवार परराष्ट्रमन्त्री खनाल समक्ष आफ्नो ओहदाको प्रमाणपत्र पेश गरेका हुन् । यसअघि करिब एक वर्ष नेपालका लागि युएनएफपीएको अन्तरिम प्रतिनिधिका रूपमा जिम्मेवारी समेत सम्हालेका श्रीलङ्काकन नागरिक हरिदासले जुलाई २०२६ देखि युएनएफपीएको पूर्ण प्रतिनिधिका रूपमा कार्यभार सम्हालेका हुन् । उनिसँग एसिया र अफ्रिकाका विभिन्न मुलुकहरूमा रणनीतिक नेतृत्व, जनसङ्ख्या कार्यक्रम तथा मानवीय सहायताका क्षेत्रमा दुई दशक बढीको कार्य अनुभव रहेको छ । ओहदाको प्रमाणपत्र पेश गर्ने क्रममा मन्त्री खनाल र प्रतिनिधि हरि दासबीच नेपाल सरकार र युएनएफपीएबीचको दीर्घकालीन साझेदारीलाई थप सुदृढ बनाउने विषयमा छलफल भएको छ ।

जनसङ्ख्या तथा विकास, यौन तथा प्रजनन स्वास्थ्य तथा अधिकार, लैङ्गिक समानता र तथ्याङ्कमा आधारित नीति निर्माणका क्षेत्रमा रणनीतिक सहकार्यलाई निरन्तरता दिने प्रतिबद्धता समेत छलफलका क्रममा व्यक्त गरिएको छ । परराष्ट्र मन्त्री खनालले जनसङ्ख्या तथा विकासका प्राथमिकताहरू अघि बढाउन र स्वास्थ्य प्रणालीलाई थप सशक्त बनाउन नेपालले युएनएफपीएसँगको लामो साझेदारीलाई उच्च महत्व दिएको बताए ।

नवनियुक्त प्रतिनिधि हरिदासले नेपालको विकास प्राथमिकता तथा अन्तर्राष्ट्रिय जनसङ्ख्या तथा विकास सम्मेलन (आईसीपीडी) को कार्ययोजनाप्रति युएनएफपीएको प्रतिबद्धता दोहोर्‍याउँदै राष्ट्रिय जनसङ्ख्या प्रणालीलाई सुदृढ बनाउन सरकार र सरोकारवालासँग मिलेर काम गर्ने बताउनुभयो । युएनएफपीएले सन् १०७१ देखि नेपाल सरकारसँग साझेदारी गर्दै आएको छ । संस्थाले यौन तथा प्रजनन स्वास्थ्य तथा अधिकार, लैङ्गिक समानता, युवा सशक्तीकरण, जनसंख्या तथ्याङ्क प्रणालीको सुदृढीकरण तथा विकासको मूलधारमा कसैलाई पनि पछाडि नछोड्ने राष्ट्रिय प्रयासमा निरन्तर सहयोग गर्दै आएको छ ।