१४ असार २०८३, आईतवार
बर्लिन । अन्तर्राष्ट्रिय नेपाली साहित्य समाज (अनेसास) जर्मनी च्याप्टरले जर्मनीका लागि नेपालका कार्यवाहक नेपाली राजदूत तथा पूर्व नियोग उपप्रमुख सागर फुयाललाई विशिष्ट सम्मान प्रदान गरेको छ।शनिबार बर्लिनमा आयोजित एक कार्यक्रमबीच फुयाललाई सम्मान गरिएको हो।
अनेसास जर्मनी च्याप्टरले फुयालले कूटनीतिक क्षेत्रमा निर्वाह गर्नुभएको उल्लेखनीय राष्ट्रसेवाका साथै लेखक, कवि तथा गीतकारका रूपमा नेपाली भाषा, साहित्य, कला र संस्कृतिको संरक्षण, संवर्द्धन तथा प्रवर्द्धनमा पुर्याउनुभएको विशिष्ट योगदानको उच्च कदर गर्दै सम्मान-पत्र प्रदान गरेको जनाएको छ।
संस्थाले फुयालले अनेसास जर्मनी च्याप्टरका पूर्व सल्लाहकारका रूपमा प्रदान गर्नुभएको मार्गदर्शन, रचनात्मक परामर्श तथा आत्मीय सहयोगप्रति हार्दिक कृतज्ञता व्यक्त गरेको छ।
अध्यक्ष सिमा ढुंगाना र महासचिव सुमन सिंखडाद्वारा हस्ताक्षरित सम्मान-पत्रमा फुयालको आगामी कूटनीतिक, प्रशासनिक तथा साहित्यिक यात्राको निरन्तर सफलता, कीर्तिमय उपलब्धि र समृद्धिको शुभकामना व्यक्त गरिएको छ।
वि.सं. २०५५ साल चैतदेखि परराष्ट्र सेवामा कार्यरत फुयाल साहित्य र संगीतका क्षेत्रमा समेत सक्रिय छन्। उनका ‘आफैंलाई खोज्न मन छ’कविता संग्रह , ‘अँजुलीमा थाप्न पाए’ (कविता तथा गीत सङ्ग्रह) र ‘तिमी र म’ सांगीतिक एल्बम प्रकाशित छन्। त्यस्तै चर्चित गीत ‘तिमी हौ सबथोक मेरो’ का स्रष्टा पनि फुयाल नै हुन्। साथै उनको नयाँ कृति समेत प्रकाशनको क्रममा छ ।
उनका उल्लेखनीय रूपमा दर्जनौं कविता, गीत तथा लेख–रचनाहरू विभिन्न साहित्यिक पत्रिका, राष्ट्रिय दैनिक तथा अनलाइन माध्यमहरूमा प्रकाशित भइसकेका छन्।
प्रकाशित मिति: १४ असार २०८३, आईतवार
