फूलले कविता लेख्छ होला

📝सागर फुयाल, बर्लिन, जर्मनी

जब मान्छे मुग्ध भई
काँडाको संख्या गन्न थाल्छ
अनुकरणीय बनाउँदै
काँडाको उचाइ र चौडाइ नाप्न थाल्छ
परम पूजनीय बनाई
काँडाको धार जाँच्न थाल्छ
बहादुरीको प्रतीक मान्न थाल्छ
अनि काँडाकै
रोमान्चक कथा र गीत लेख्न थाल्छ,
फूलले पनि विवश भई
मौन कविता लेख्छ होला
सराप्दै आफैंलाई
आफ्नो कोमलता, निर्दोषितालाई
आफ्नो सुवास, सौन्दर्यलाई
आफ्नो पवित्र, प्रेमिल स्वभावलाई !