९ बैशाख २०८३, बुधबार
काठमाडौँ । नेपाली कम्युनिष्ट पार्टीका सहसंयोजक माधवकुमार नेपालले नेपालबाट कम्युनिष्ट आन्दोलन ओरालो लागेको बताएका छन् ।
नेपाल कम्युनिष्ट पार्टीको स्थापना दिवसको अवसरमा बुधवार आयोजित कार्यक्रममा उनले आफूहरुकै अगाडी कम्युनिष्ट आन्दोलन ओरालो लागेको बताएका छन् । उनले कम्युनिष्ट आन्दोलनलाई फेरि माथी उठाउन नयाँ शीराबाट काम गर्नुपर्ने बताए । यसका लाग कम्युनिष्ट पार्टीहरुले आफूभित्र गम्भिर समिक्षा तथा आत्ममूल्यांकन गर्नुपर्ने आवश्यकता औंल्याएका छन् । उनले नेपालमा हालै भएको प्रतिनिधि सभा सदस्यको निर्वाचन परिणामले कम्युनिष्ट पार्टीलाई ठूलो धक्का दिएको उल्लेख गरेका छन् । उनले राजनीतिक जीवनमा उतारचढाव स्वाभाविक भएको उल्लेख गर्दै पराजयलाई सहज रूपमा लिनुपर्ने बताए । निर्वाचनमा पराजय हुँदैमा आत्तिनेहरूले जित हासिल गर्न नसक्ने उनको भनाई छ । उनले कम्युनिष्ट आन्दोलनलाई पुनर्जीवित गर्न नयाँ ऊर्जा र दृष्टिकोण आवश्यक रहेको औंल्याउँदै फेरि उठेर अघि बढ्न कार्यकर्तालाई आह्वान गरेका छन् ।
उनले भने, ‘हामीले हेर्दाहेर्दा कम्युनिष्ट आन्दोलन ओरालो लागेको छ । यसपटकको निर्वाचनमा अप्रत्याशित रुपको परिणाम सामना गर्नुपरेको छ, ठुलो धक्का खानु परेको छ । यसको हामीले विश्लेषण गर्ने कि नगर्ने ? हाम्रो कमजोरीको बारेमा छलफल चलाउने कि नचलाउने ? हाम्रा कमी कमजोरीहरुको खुला छलफल गर्नुपर्ने आवश्यक्ता छ । राजनीतिक जीवनमा उकालो ओरालो आउँछ, यसलाई सबैले आत्मासाथ गर्नुपर्छ । कहिले सफलता कहिले पराजय हुन्छ । पराजय हुने वित्तिकै, हार हुने वित्तिकै आत्तिनेहरुले जीत हासिल गर्न सक्दैन । त्यसो भएको हुनाले जीतको लागी फेरि नयाँ शीराबाट उठेर अगाडी बढ्नुपर्छ ।’
उनले चीनीयाँ कम्युनिष्ट पार्टी र विश्व कम्युनिष्ट आन्दोलनमा पनि विभिन्न उताडचडापहरु आएको उल्लेख गरेका छन्। धरापमा परेको चीनियाँ कम्युनिष्ट पार्टीलाई माओत्से तुङले पुनर्जीवित गरेको उल्लेख गर्दै उनले नेपालको कम्युनिष् आन्दोलनलाई पुनर्जीवित गर्न सकिने बताए ।
प्रकाशित मिति: ९ बैशाख २०८३, बुधबार
