विश्व सम्पदा दिवसः सम्पदाको संरक्षण र भविष्यको चुनौती

काठमाडौँ । आज अप्रिल १८ । विश्वभरका मानिसहरूले आफ्नो सांस्कृतिक र प्राकृतिक सम्पदाको महत्व बुझ्न र तिनीहरूको संरक्षणका लागि ऐक्यवद्धता जनाउँदै विश्व सम्पदा दिवस मनाइरहेका छन् ।

सम्पदाको संरक्षणका लागि जनचेतना फैलाउने उद्देश्यले आज विश्व सम्पदा दिवस विभिन्न कार्यक्रमका साथ मनाइएको हो । हाम्रो इतिहास, संस्कृति र पहिचानका जीवित साक्षी रहेका यी सम्पदाहरूको संरक्षण गर्नु हामी सबैको साझा दायित्व हो । संयुक्त राष्ट्रसंघीय शैक्षिक, वैज्ञानिक तथा सांस्कृतिक संस्था (युनेस्को) अन्तर्गत रहेका विश्व सम्पदा क्षेत्रको संरक्षण गर्ने उद्देश्यले सन् १९८३ देखि अप्रिल १८ तारिखका दिन यो दिवस मनाउन थालिएको हो । नेपालजस्तो ऐतिहासिक र सांस्कृतिक दृष्टिले धनी मुलुकका लागि यो दिवसको विशेष महत्व छ । यहाँका पशुपतिनाथ, बौद्धनाथ, स्वयम्भूनाथ, चाँगुनारायण, काठमाडौं, पाटन र भक्तपुर दरबार क्षेत्र, लुम्बिनी, सगरमाथा राष्ट्रिय निकुञ्ज र चितवन राष्ट्रिय निकुञ्ज जस्ता १० वटा सम्पदाहरू युनेस्कोको विश्व सम्पदा सूचीमा सूचीकृत छन् ।

जलवायु परिवर्तन, तिब्र शहरीकरण र कहिलेकाहीँ आउने प्राकृतिक विपत्तिहरूले हाम्रा अमूल्य सम्पदाहरूलाई जोखिममा पारिरहेका छन् । २०७२ को भूकम्पले पु¥याएको क्षतिलाई पुनर्निर्माण गर्ने कार्य अझै पनि केही क्षेत्रमा जारी छ । यस्तो अवस्थामा स्थानीय समुदायको सक्रिय सहभागिता र आधुनिक प्रविधिको प्रयोगमार्फत संरक्षण कार्यलाई अगाडि बढाउनु आवश्यक देखिएको छ ।