१२ चैत्र २०८२, बिहीबार
काठमाडौँ। कानून, न्याय तथा संसदीय मामिलामन्त्री अनिलकुमार सिन्हाले कानून मन्त्रालयमा फाइल अड्किने गरेको गुनासोलाई स्पष्ट कार्यतालिका बनाएर सम्बोधन गर्न निर्देशन दिएका छन् ।
बिहीवार मन्त्रालयमा आयोजित विदाई कार्यक्रममा उनले अन्य मन्त्रालयमा जाँदा आफूले कानुन मन्त्रालयमा आउने फाईलहरु अड्केर बस्ने गरेको गुनासो आएको बताएका छन् । उनले कानूनी अस्पष्टता, सम्बन्धित निकायबाट आवश्यक जानकारी समयमै नआउने र आपसी समन्वय अभावका कारण काममा ढिलाइ हुने गरेको पाईएको बताए । उनले समस्या समाधानका लागि कर्मचारीहरू आफैँ सक्रिय हुनुपर्नेमा जोड दिएका छन् । आवश्यक परे सम्बन्धित मन्त्रालयका अधिकारीलाई मन्त्रालयमै बोलाएर वा स्वयं फाइल लिएर सम्बन्धित निकायमा पुगेर छलफल गर्न उनले आग्रह गरेका छन् । मन्त्री सिन्हाले सुशासनका लागि समयसीमा निर्धारण गरेर काम गर्न पनि आग्रह गरेका छन् । मन्त्रालयमा दर्ता भएका फाइल कति दिनभित्र टुंगो लाग्ने भन्ने स्पष्ट मापदण्ड तयार गरेर काम गर्न उनको सुझाव छ । उनले सुशासनको लागी राम्रो सिष्टम बनाउनुपर्ने र सिष्ट बनाउने काम कर्मचारीको भएको बताएका छन् । केही कर्मचारीका कारण सम्पूर्ण निजामती सेवामाथि नकारात्मक धारणा बनेको उल्लेख गर्दै उनले त्यसलाई चिर्न आवश्यक रहेको बताएका छन् ।
उनले भने, ‘अरु मन्त्रालयमा जाँदाखेरी कानुनमा गएका कामहरुमा धेरै ढिलाई हुने गरेको सुन्नुप¥यो, यहाँहरुसँग आएर मैले छलफल पनि गरे । कतिपय कुराहरुमा स्पष्टता नभएको कारणले तत् निकायबाट स्पष्ट पार्नको लागि जानकारी माग भएका कुराहरु नआएको कारणले र कोही आएर छलफल नगर्दैको कारणले ढिला हुने गरेको पाईयो । तपाईहरु आफ्नै तर्फबाट अनुरोध गरे यहाँ बोलाउँनुस्, होइन भने तपाईहरु फाईल लिएर सम्बन्धित मन्त्रालयमा गएर सो संग सम्मन्धित अधिकृतसंग छलफल गरेर टुंगोमा पु¥याउनुस् र कार्यतालिका बनाएर त्यसलाई समाधान गर्नुस् । मन्त्रालयमा आएको फाईललाई मन्त्रालयमा आएपछि कति दिनमा काम सकिन्छ भन्ने कुरा सुशासनको सबैभन्दा पहिलो आवश्यकता हो । हामीले सुशासनको लागी सकरात्मक वातावरण बनाउन पर्छ । हामीले वातावरण बनाएर सिष्टममा बसेर हामी काम गर्ने हो भने अगाडी बढ्छ । सिष्टम बनाउने कर्मचारीले नै हो । कर्मचारीहरुलाई गाली गरेको सुन्छु म । केही कर्मचारीको कारणले समग्र कर्मचारीमाथी आरोप लाग्ने गरेको छ । यसलाई चिर्न आवश्यक छ ।’
उनले आफूले सम्हालेका मन्त्रालयमध्ये कानून मन्त्रालयमा सुशासन कायम रहेको पाएको बताएका छन् । आगामी दिनमा पनि सुशासन कायम राखेर काम गर्न उनले आग्रह गरेका छन् ।
प्रकाशित मिति: १२ चैत्र २०८२, बिहीबार
