९ चैत्र २०८२, सोमबार
काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेसँग सम्बन्धित सम्पत्ति शुद्धीकरण र सङ्गठित अपराध मुद्दामा अभियोगपत्र संशोधन गर्ने विषयमा महान्यायाधिवक्ताविरुद्ध दायर रिटको सुनुवाइ अपूर्ण रहँदा ‘हेर्दाहेर्दै’ मा राखिएको छ।
न्यायाधीश विनोद शर्मा र अब्दुल अजिज मुसलमानको संयुक्त इजलासमा बहस नसकिएकाले मुद्दा मंगलबारका लागि सारिएको हो। महान्यायाधिवक्ता सविता भण्डारीले पुस ३० गते दिएको निर्देशनमा लामिछानेलाई सहकारी ठगीमा मात्र मुद्दा चलाउने र अन्य दुई गम्भीर आरोप हटाउन भनिएको थियो। सोही आधारमा कास्की र रुपन्देहीमा निवेदन परे पनि सर्वोच्चमा मुद्दा विचाराधीन भएकाले प्रक्रिया अघि बढ्न सकेको छैन।
तर काठमाडौँ र पर्साका सरकारी वकिल कार्यालयले भने अहिलेसम्म अभियोगपत्र संशोधनका लागि निवेदन दिएका छैनन्।
प्रकाशित मिति: ९ चैत्र २०८२, सोमबार
