रवि लामिछाने विरुद्ध मुद्दा फिर्ता गर्ने निर्णयसम्बन्धी रिटमाथि आज सर्वोच्च अदालतमा बहस हुँदै

काठमाडौँ । राष्ट्रिय स्वतन्त्र पार्टीका सभापति रवि लामिछानेमाथि सहकारी ठगीसँगै जोडिएको सङ्गठित अपराध र सम्पत्ति शुद्धीकरण मुद्दा फिर्ता गर्ने निर्णयविरुद्ध परेको रिटमा सर्वोच्च अदालतमा आज (सोमबार) सुनुवाइ हुँदैछ।

यसअघि अदालतले सम्बन्धित निर्णयको फाइल झिकाउन आदेश दिएकोमा महान्यायाधिवक्ताको कार्यालयले फाइल पेस गरेपछि सुनुवाइ अघि बढ्न लागेको हो। महान्यायाधिवक्ताले लामिछानेमाथि सहकारी ठगीबाहेकका अन्य मुद्दा हटाउन निर्देशन दिएकी थिइन्, जसविरुद्ध अधिवक्ताहरूले रिट दायर गरेका हुन्। केही जिल्लामा संशोधन प्रक्रिया अघि बढे पनि सर्वोच्चमा मुद्दा विचाराधीन रहेकाले अन्तिम टुंगो लागेको छैन।