६ चैत्र २०८२, शुक्रबार
काठमाडौँ । सर्वोच्च अदालतकी न्यायाधीश शान्तिसिंह थापाले अध्ययन, निष्ठा र अनुशासन नै सफलताको पूर्वशर्त भएको बताएकी छिन् ।
शुक्रवार भक्तपुरमा नेपाल बारले आयोजना गरेको कानून व्यवसायी महिलाहरुको राष्ट्रिय सम्मेलनलाई सम्बोधन गर्दै उनले यस्तो बताएकी छिन् उनले अध्ययन र अनुशासन बिना कानून पेशामा टिक्न नसकिने बताएकी छिन् । न्यायाधीश थापाकाअनुसार सफलताका पूर्वशर्तहरूमा गहिरो अध्ययन, कार्यदक्षता, क्षमता अभिवृद्धि, पेशागत निष्ठा, इमान्दारिता र कडा अनुशासन हुन् । न्यायाधीश थापाले सम्मेलनमा उपस्थित सहभागीहरूलाई केवल औपचारिकताका लागि मात्र नभई कार्यपत्रहरूमा घनीभूत छलफल गर्न र सशक्त घोषणापत्र तयार गर्न आग्रह गरिन् । उनले औपचारिक कार्यक्रमहरूमा धैर्यता र अनुशासन पालना गर्नु कानून व्यवसायीको पहिलो पहिचान भएको बताएकी छिन् ।
उनले भनिन्, ‘मैले एउटा मूल मन्त्रको रूपमा यहाँहरूलाई पूर्वशर्त के चाहीँ आग्रह गर्न चाहन्छु भने केही पूर्वशर्तहरू रहन्छन् । व्यक्तित्व विकासको लागि । त्यो हो अध्ययन, दक्षता, क्षमता, निष्ठा, इमानदारिता र अनुशासन यी पूर्वशर्त हुन् । यिनलाई मूल मन्त्रको रूपमा आत्मसात् गर्नुभयो भने तपाईंहरूले कुनैपनि क्षणमा कुनैपनि व्यवसायमा तपाईंहरूले आफूलाई पछाडि परेको महशुस गर्नुहुने छैन । आफूलाई एकदम सबल र सक्षम रूपमा स्थापित गर्न सक्नुहुनेछ ।’
नेपालको संविधानले आत्मसात गरेको समानुपातिक समावेशिताको सिद्धान्त व्यवहारमा लागू भइरहेको बताएकी छिन् ।
प्रकाशित मिति: ६ चैत्र २०८२, शुक्रबार
