२३ फाल्गुन २०८२, शनिबार
कास्की। कास्की निर्वाचन क्षेत्र नम्बर २ वाट राष्ट्रिय स्वतन्त्र पार्टीको तर्फबाट प्रतिनिधि सभा सदस्यमा निर्वाचित उत्तमप्रसाद पौडेलले जेन–जी आन्दोलनको मर्मअनुसार काम गर्ने बताउनुभएको छ ।
प्रतिनिधि सभा सदस्य निर्वाचित भएको प्रमाणपत्र लिने क्रममा उहाँले निर्वाचनले दिएको म्याण्डेटलाई नेपाली जनता र देशको हितमा प्रयोग गर्ने बताउनु भयो । उहाँले देशलाई निकास दिनुपर्ने आजको आवश्यक्ता औँल्याउँदै सबै पक्षलाई समेटेर लैजाने प्रतिवद्धता जनाउनु भयो । आफूलाई मत दिने र नदिने सबैको प्रतिनिधित्व हुनेगरी काम गर्ने उहाँको भनाई छ ।
उहाँले भन्नुभयो, ‘जित हार फरक कुरा हो, तर देशलाई निकास दिनुपर्ने आजको आवश्यक्ता रहेको छ । यो जटिल परिस्थितिमा जेनजी आन्दोलन पछि जुन हिसावको निर्वाचन भयो, यो निर्वाचनले दिएको म्याण्डेड के हो ? त्यसको मर्म के हो भन्ने हिसावले काम गर्ने र आम नेपाली नागरिक र नेपालको पक्षमा काम गर्नेगरि काम गर्नेछु, मतदान गर्नेलाई धन्यवाद दिन चाहन्छु, जसले मतदान गर्नुभएन, उहाँहरुको पनि प्रतिनिधित्व हुनेगरी अब आउने ५ वर्ष काम गर्ने प्रतिवद्धता जनाउँछु ।’
कास्की क्षेत्र नम्बर २ मा पौडेलले ३१ हजार ९११ मत ल्याएर प्रतिनिधि सभा सदस्यमा निर्वाचित हुनुभएको हो । उहाँका निकटम प्रतिष्पर्धी नेकपा एमालेका रश्मि आचार्यले ७ हजार ४९३ मत मात्रै प्राप्त गर्नुभयो । नेपाली काँग्रेसका माधवप्रसाद बाँस्तोलाले ६ हजार ५००, राप्रपाका हेमजङ गुरुङले १ हजार ६४३, नेपाली कम्युनिष्ट पार्टीका हेमबहादुर थापा पराजुलीले १ हजार २७६ र उज्यालो नेपाल पार्टीका कुशल गुरुङले १ हजार २०१ मत पाउनुभयो । यो निर्वाचन क्ष्नेत्रमा ५२ हजार ५ सय १९ मत खसेको थियो ।
प्रकाशित मिति: २३ फाल्गुन २०८२, शनिबार
