२१ फाल्गुन २०८२, बिहीबार
ओखलढुंगा । सामाजिक सञ्जालमार्फत फैलाइएको भ्रामक सूचनाप्रति प्रहरीले गम्भीर ध्यानाकर्षण भएको जनाएको छ।
जिल्ला प्रहरी कार्यालय ओखलढुंगा ले जारी गरेको प्रेस विज्ञप्तिअनुसार सुशासन संचार नामक फेसबुक पेजबाट मतदान बिथोल्ने उद्देश्यले गोली चलेको र एक व्यक्तिको मृत्यु भएको भनी फैलाइएको सूचना पूर्ण रूपमा भ्रामक र गलत रहेको स्पष्ट पारेको छ।
प्रहरीका अनुसार हाल ओखलढुंगा जिल्लामा मतदान कार्यक्रम शान्तिपूर्ण वातावरणमा सञ्चालन भइरहेको छ। झुटा तथा अप्रमाणित समाचार फैलाई आम नागरिकमा त्रास फैलाउने कार्य कानुनविपरीत रहेको जनाउँदै यस्ता भ्रामक सूचना फैलाउने व्यक्तिको पहिचान तथा खोजतलास गरी कानुनअनुसार आवश्यक कारबाही प्रक्रिया अघि बढाइएको प्रहरीले जनाएको छ।
प्रहरीले सर्वसाधारणलाई कुनै पनि अपुष्ट सूचना नपत्याउन र आधिकारिक स्रोतबाट मात्र जानकारी लिन अनुरोध गरेको छ।
प्रकाशित मिति: २१ फाल्गुन २०८२, बिहीबार
