२० माघ २०८२, मंगलवार
काभ्रेपलाञ्चोक । गृह मन्त्रालयले लागू गरेको वडा तहबाट अनलाइन नागरिकता सिफारिस सेवा जिल्लामा प्रभावकारी बन्दै गएको छ । गत भदौ १ गतेदेखि सुरु भएको सेवाबाट पाँच महिनामा चार हजार १७७ जनाले नागरिकता प्राप्त गरेका छन् ।
जिल्लाका सबै १३५ वडाबाट एकसाथ सुरु गरिएको यो सेवाअन्तर्गत वडाले आवश्यक कागजात अनलाइनमार्फत स्क्यान गरी सिफारिस पठाउँछन् । सोही सिफारिसका आधारमा सेवाग्राही जिल्ला प्रशासन कार्यालय पुगेर छिटो र सहज रूपमा नागरिकता प्राप्त गर्न सक्ने व्यवस्था गरिएको छ ।
वडाबाट अपलोड गरिएको फाइल कोडका आधारमा विवरण प्रविष्ट गरिएलगत्तै नागरिकता प्रिन्ट हुने प्रणाली रहेको छ । सनाखत गर्ने व्यक्तिको पूर्ण विवरणसमेत अनलाइनमै सुरक्षित रहने भएकाले अभिलेखमा एकरूपता कायम भएको छ । साथै, जिल्ला प्रशासन कार्यालयले पनि कागजात स्क्यान गरी डिजिटल अभिलेख सुरक्षित राख्ने व्यवस्था गरेको छ ।
अनलाइन सिफारिस प्रणाली लागू भएपछि एउटै कामका लागि विभिन्न निकाय धाउनुपर्ने बाध्यता हटेको छ । यसले नागरिकलाई झन्झटबाट मुक्त गराउनुका साथै झुटो विवरण पेश गरेर नागरिकता लिन खोज्नेहरूलाई भने कठिनाइ भएको छ ।
कार्यालयका प्रशासकीय अधिकृत राजु शर्माका अनुसार यो प्रणालीले अभिलेख सुरक्षित, त्रुटि न्यून र सेवा छिटो भएको छ । “अभिलेखका लागि राखिएका कागजात सुरक्षित रहन्छन् र समयको बचत पनि भएको छ”, उनले बताए ।
प्रमुख जिल्ला अधिकारी गोपालकुमार अधिकारीले नागरिकतालगायत सबै सेवामा नागरिकलाई झन्झटरहित र सरल सेवा प्रदान गर्ने लक्ष्यका साथ प्रणाली लागू गरिएको स्पष्ट पारे ।
प्रकाशित मिति: २० माघ २०८२, मंगलवार
