१३ माघ २०८२, मंगलवार
काठमाडौँ । नेपाली कांग्रेसको आधिकारिक वेबसाइटबाट शेरबहादुर देउवा नेतृत्वको कार्यसमितिको नाम हटाइएको छ। विशेष महाधिवेशनबाट सभापति निर्वाचित गगन थापा नेतृत्वको कार्यसमितिले पदबहाली गरेपछि पुरानो सूची हटाइएको केन्द्रीय कार्यालय स्रोतले जनाएको छ।
यद्यपि, वेबसाइटमा थापा नेतृत्वको नयाँ कार्यसमितिको विवरण अझै अपलोड गरिएको छैन। पदाधिकारीहरूको फोटो, नाम र सामाजिक सञ्जाल लिंकसहित सामग्री तयार गर्ने काम भइरहेको जनाइएको छ। पदाधिकारीहरू भने सर्वोच्च अदालतको फैसलापछि मात्रै पूर्णरूपमा काम गर्ने मानसिकतामा रहेको बताउँछन्। हाल निर्वाचनसम्बन्धी काम मात्र अघि बढाइएको छ।
गत पुस २७–३० मा सम्पन्न विशेष महाधिवेशनलाई पुरानो संस्थापन समूहले अस्वीकार गरे पनि निर्वाचन आयोगले गगन थापा–विश्वप्रकाश शर्मा नेतृत्वको महाधिवेशनलाई मान्यता दिएको छ। त्यसविरुद्ध दायर रिटमा सर्वोच्चले आयोगसँग १५ दिनभित्र लिखित कारण पेश गर्न निर्देशन दिएको छ।
प्रकाशित मिति: १३ माघ २०८२, मंगलवार
