१३ माघ २०८२, मंगलवार
गोरखा । राष्ट्रिय स्वतन्त्र पार्टी (रास्वपा)को तर्फबाट गोरखा–१ बाट प्रत्यक्षतर्फको उम्मेदवार बनेका सुदन गुरुङले आउँदो निर्वाचनलाई लक्षित गर्दै गोरखा–१ अन्तर्गत चुमनुब्री गाउँपालिकाबाट घरदैलो अभियान सुरु गरेका छन् । उनले ‘विकास, इमानदारी र परिवर्तन’को सन्देशसहित अभियानको पहिलो दिन स्थानीयसँग प्रत्यक्ष भेटघाट गर्ने बताएका छन् ।
अभियानको सुरुआत गर्दै उनले यो यात्रा कुनै पदको लोभका लागि नभई गोरखाको माटोप्रतिको कर्तव्य र देशप्रतिको जिम्मेवारीबाट प्रेरित भएको बताए। वीरभूमि गोरखाले दिएको इतिहास, पहिचान र संस्कारलाई सम्मान गर्दै अधुरा सपना पूरा गर्ने प्रतिबद्धता व्यक्त गरेका छन् ।
उनले विकास, सुशासन र इमानदार सेवामार्फत जनताको भरोसा जित्ने अठोट व्यक्त गर्दै स्थानीयवासीको साथ, विश्वास र आशीर्वाद नै आफ्नो मुख्य शक्ति भएको उल्लेख गरे। अभियानलाई गोरखाको सम्मान, समाजको भविष्य र देशको हितका लागि साझा यात्रा बनाउने आह्वान गरिएको बताएका छन् ।
प्रकाशित मिति: १३ माघ २०८२, मंगलवार
