सेन्ट्रल ओपनमा राहुलको अग्रता कायमै

काठमाडौँ। एमेच्योर गल्फर एवम् डिफेन्डिङ च्याम्पियन राहुल विश्वकर्माले सूर्य नेपाल सेन्ट्रल ओपनको दोस्रो दिनमा पनि शिर्ष स्थानमा अग्रता कायमै राखेको छ ।

सूर्य नेपाल सेन्ट्रल ओपन यस सिजनको सूर्य नेपाल गल्फ टुर (२०२५–२६) को पहिलो प्रतियोगिता हो । उक्त प्रतियोगितामा एमेच्योर गल्फरले आफ्नो दबदबा दोस्रो दिन पनि कायमै राखेका छन् । गोकर्ण गल्फ क्लबमा राहुलले पाँच अन्डर ६७ को स्कोर गर्दै मंगलबारको खेल पूरा गरे । यससँगै उनले समग्रमा ११ अन्डर १ सय ३३ को स्कोर बनाए । राहुलले प्रोफेसनल खेलाडी भुवनकुमार रोक्कामाथि सात स्ट्रोकले अग्रता लिएका छन् । भुवन समग्रमा चार अन्डर १ सय ४० को कार्डमा छन् । उनले दोस्रो दिन पाँच अन्डर ६७ स्कोर गरे पनि दोस्रो स्थानमा नै रहे । राहुल उपाधि रक्षा गर्ने लक्ष्यमा छन् ।

उनले फ्रन्ट नाइनमा तीन अन्डर ३३ खेल्दा ब्याक नाइनमा दुई अन्डर ३४ पूरा गरेका थिए । राहुलले दोस्रो, तेस्रो, पाँचौं, सातौं र नवौं होलमा बर्डी प्रहार गरे । तर, उनले चौथो र छैटौं होलमा बोगी खेपे । यसपछि राहुलले दशौंं, ११औं, १३औं र १४औं होलमा पनि समान एक सट बचाए । तर, उनी १५औं र १६औं होलमा लगातार दुई बोगी प्रहार गर्न पुगे । जयराम श्रेष्ठले तेस्रो स्थानबाट पछ्याइ रहेका छन् । उनले दोस्रो दिन इभन–पार ७२ खेले । उनी समग्रमा एक अन्डर १ सय ४३ को स्कोर छन् । भुवन नगरकोटी चौथो स्थानमा उक्लिए । समग्रमा उनी एक ओभर १ सय ४५ को स्कोरमा छन् ।

उनले दोस्रो दिनको खेल इभन पार ७२ मा सकाए । चार खेलाडी संयुक्त रूपमा पाँचौं स्थानमा छन् । नेपाल नम्बर एक प्रो नीरज तामाङ (६९), शुक्र बहादुर राई (७१), दिनेश प्रजापति (७३) तथा एमेच्योर रुबेन थापा (७०) समग्रमा दुई ओभर १ सय ४६ को स्कोरमा छन् । चार ओभर १ सय ४८ स्कोरमा रबि खड्का (७१), प्रदीप कुमार लामा (७५) तथा एमेच्योर फुन्सो नोर्बु लामा (७५) संयुक्त रूपमा आठौं स्थानमा रहे । यस प्रतियोगिता १८ प्रोफेसनल र ६ एमेच्योर गरी २४ खेलाडीले कट (११ ओभर १५५ स्कोर गरेका) बनाएका छन् । प्रोतर्फ सूर्यप्रसाद शर्मा, तोरणविक्रम शाही, दीपक मगर, किसन कालीराज सुनार, धनबहादुर थापा, टंकबहादुर कार्की, कुमार कामी, रमेश अधिकारी र रामे मगरले कट बनाएका हुन् ।

एमेच्योरतर्फ साम डोबलार्ड, टासी छिरिङ र बलराम पौडेलले पनि कट बनाए । एमेच्योर वाङ्चेन ढोन्डुपसँगै भीमसेन चौलागार्इं, सञ्जय लामा र सबिन सापकोटाले ११ ओभर १ सय ५५ स्कोर गरेका थिए । तर, उनीहरू काउन्ट ब्याकमा पछि पर्दा कट बनाउन असफल भए । विजेताले १ लाख ७० हजार, उपविजेताले एक लाख २५ हजार रुपैयाँ, तेस्रो हुनेले एक लाख रुपैयाँ, चौथोले ८२ हजार रुपैयाँ र पाँचौं हुने खेलाडीले ७२ हजार रुपैयाँ नगद पुरस्कार प्राप्त गर्नेछन् । कट बनाउने शीर्ष १८ गल्फरले पनि नगद पुरस्कार पाउनेछन् ।