१९ मंसिर २०८२, शुक्रबार
काठमाडौँ। नेपाली काँग्रेसका नेता एवं काठमाडौं मेडिकल कलेजका सञ्चालक डा. सुनिल शर्माले स्वास्थ्य बीमा कार्यक्रमलाई १० लाख पुर्याउनुपर्ने बताएका छन् ।
शुक्रवार भक्तपुरको कौशलटारस्थित पुलमुनि बस्दै आएको इलामका एक व्यक्तिलाई उद्धार गरी अस्पतालमा उपचार गर्न लैजाने क्रममा उनले यस्तो बताएका हुन् । उनले स्वास्थ्य बीमा कार्यक्रमलाई पाँचदेखि १० लाखसम्म पुर्याउनुपर्ने अहिलेको आवश्यकता भएको उल्लेख गरेका छन् । आफूले यसबारेमा सार्वजनिक महत्वको प्रश्ताव नै संसदमा दर्ता गरिसकेको उनको भनाइ छ । वर्तमान सरकारले पनि यसबारेमा उचित कदम चाल्नुपर्ने उनको आग्रह छ । उपचार नपाएर तड्पिएका नागरिकहरु नेपालमा हजारौँको संख्यामा रहेको भन्दै यो समस्या सरकारीस्तरबाटै समाधान हुनुपर्ने जिकिर गरेका छन्। राज्यको नीतिबाटै उनीहरुको स्वास्थ्योपचारको ग्यारेन्टी हुनुपर्ने बताएका छन् ।
उनले भने, ‘नेपालीहरुको स्थिति यस्तो छ भनेर नेपालका शासक वर्गले स्वास्थ्य बीमा कार्यक्रमलाई पाँचदेखि १० लाखसम्म पुर्याउनुपर्छ भनेर मैले सदनमा सार्वजनिक महत्वको प्रश्ताव नै दर्ता गरेको हो । अहिलेको सरकारलाई पनि आह्वान गर्न चाहन्छु, लाखौँको संख्यामा नेपाली जनताको अवस्था घर भएपनि गरिबी र आततायी अवस्था भएको लाखौँको संख्यामा नागरिकहरु छन् । यो सरकारीस्तरबाटै समाधान हुनुपर्छ । हामीले दुई,चार हजार मान्छे बोकेर हल हुँदैन । राज्यको नीतिले नै हल गर्नुपर्छ, यस्तो समस्या ।’
उनले एक हजार शैय्याको निःशुल्क उपचार गर्ने अस्पताल निर्माण गर्ने आफ्नो लक्ष्य रहेको बताएका छन् । शुक्रवार शर्माले भक्तपुरको कौशलटारस्थित हनुमन्ते खोलाको पुलमुनि बस्दै आएका इलामका एक नागरिकको पेट सुन्निएको र उपचार गर्न नसकेको भन्दै उनलाई केएमसी अस्पताल लगेर उपचार शुरु गरेका हुन् । उक्त व्यक्तिको पेट सुन्निएको एक हप्ता भइसकेकाले उपचार जरुरी रहेको उनको भनाइ छ ।
प्रकाशित मिति: १९ मंसिर २०८२, शुक्रबार
