विपिन जोशी जीवित नरहेको इजरायली सेनाको पुष्टि

काठमाडौं । हमासले नियन्त्रणमा लिएका कञ्चनपुरका नेपाली विद्यार्थी विपिन जोशी जीवित नरहेको इजरायली सेनाले पुष्टि गरेको छ ।

इजरायली सेना (आईडीएफ) का अधिकारीले आज बिहान साढे ७ बजे इजरायलका लागि नेपाली राजदूत धनप्रसाद पण्डित, अमेरिकामा रहेकी विपिनकी बहिनी, नेपालका दाजु किशोर जोशीलगायतलाई भिडियो कन्फरेन्समार्फत विपिनको निधन भएको औपचारिक जानकारी दिएका हुन् ।

हमासले इजरायलको किबुत्ज क्षेत्रमा आक्रमण गर्दा विपिन बन्धक बनाइएका थिए । त्यस क्रममा १० जना नेपाली विद्यार्थीको ज्यान गएको थियो । सन् २०२३ नोभेम्बरमा विपिन गाजाको अल शिफा अस्पतालमा देखिएका थिए, तर त्यसपछि उनी बेपत्ता थिए । अमेरिकाको पहलमा भएको युद्धविरामपछि रिहा गरिने २० जनाको सूचीमा पनि विपिनको नाम नदेखिएको बताइएको छ ।

विपिनको अवस्थाबारे नेपाल सरकारले लगातार कूटनीतिक पहल गरे पनि सफल हुन सकेन  ।