२१ भाद्र २०८२, शनिबार
काठमाडौँ। नेपाल प्रिमियर लिग (एनपिएल) को दोस्रो संस्करणको ट्रफी टुर कोशी प्रदेशको विराटनगर किङ्सबाट शुरु हुने भएको छ ।
पहिलोपल्ट ट्रफी टुर गर्न लागेको नेपाल क्रिकेट संघ (क्यान) ले कोशीका विभिन्न स्थानमा पुर्याउँदै ट्रफी टुरको शुरुवात गर्ने भएको छ । फ्रेन्चाइज टोली विराटनगर किङ्स, जनकपुर बोल्ट्स, चितवन राइनोज, काठमाडौं गोर्खाज, पोखरा एभेन्जर्स, लुम्बिनी लायन्स, कर्णाली याक्स र सुदूरपश्चिम रोयल्सका शहरमा ट्रफी टुर गरिन लागिएको हो । क्यानले शुक्रवार साँझ एक कार्यक्रमका बीच पहिलोपल्ट एनपिएलको ट्रफी टुर गर्न लागिएको जानकारी दिएको थियो । दोस्रो संस्करणको एनपिएल आगामी पुस १ देखि २७ गतेसम्म काठमाडौंमा हुनेछ । त्यसअघि विभिन्न ट्रफी टुर गर्दै फ्रेन्चाइज टोलीसँग समर्थकलाई जोड्ने काम गरिने भएको छ । आजदेखि सुर भएको ट्रफी टुर आगामी कात्तिक २३ गतेसम्म हुने क्यानले जनाएको छ ।
क्यानका सचिव तथा एनपिएल गभर्निङ काउन्सिलका प्रमुख पारस खड्काले पूर्वको मेची देखि पश्चिमको महाकालीसम्म पुग्ने बताए । सबैभन्दा पहिलो उक्त ट्रफी टुरको सुरुआत कोशी प्रदेशबाट गर्न लागिएको शुरु भएको छ । त्यसपछि ट्रफी टुर जनकपुर बोल्ट्सको प्रदेश मधेश प्रदेश पुग्नेछ । जनकपुर पहिलो संस्करणको विजेता पनि हो । त्यहाँबाट उक्त ट्रफी चितवन पुग्नेछ । चितवन राइनोजको शहर परिक्रमपछि ट्रफी काठमाडौं आइपुग्ने कार्यक्रम छ । काठमाडौं गोर्खाजले विभिन्न ऐतिहासिक स्थलमा ट्रफी टुर गराउनेछ । त्यसपछि पोखरा र लुम्बिनी कर्णालीमा उक्त ट्रफी टुर विभिन्न कार्यक्रमसहित मनाइनेछ । अन्तिममा उक्त ट्रफी रोयल्सको प्रदेश सुदूरपश्चिम पुग्नेछ ।
क्यानले ग्लोबल वार्मिङ र वातावरण संरक्षणसँग एनपिएलको ट्रफीलाई जोडेको छ । उक्त ट्रफीमा कालापत्थरबाट ल्याइएको ढुङ्गा राखिएको छ । शुक्रवार भएको कार्यक्रमा कीर्तिमानी पर्वतारोहीहरू फुन्जु जाङ्मी, मिङ्मा ग्याल्जे शेर्पा र मिङ्मा डेबिट शेर्पाले ट्रफी सार्वजनिक गरेका थिए । क्यान सचिव खड्काले ट्रफी कुन कुन ठाउँमा पुर्याउने फ्रेन्चाइज टोलीले नै तय गर्ने जानकारी दिए । दोस्रो संस्करणको एनपिएलका लागि मिनी अक्सन पनि भइसकेको छ ।
प्रकाशित मिति: २१ भाद्र २०८२, शनिबार
