२७ श्रावण २०८२, मंगलवार
काठमाडौँ। प्रधानमन्त्री केपी शर्मा ओलीले राष्ट्रिय आत्मविश्वास निर्माण गर्ने समय आएको बताएका छन् ।
अनलाइनखबरको ‘चालिस मुनिका चालिस’ युवा सम्मान कार्यक्रमलाई काठमाडौंमा सम्बोधन गर्दै उनले अब व्यक्ति व्यक्तिका आत्मविश्वास मिलाएर राष्ट्रिय आत्मविश्वास निर्माण गर्ने समय आएको बताएका छन् । राष्ट्रिय आत्मविश्वासले मात्रै देश निर्माण गर्नसक्ने उनको भनाइ छ । सबै आफ्नो आफ्नो क्षेत्रमा विज्ञ रहने भन्दै आफ्नो क्षमताको पहिचान गरी आफ्नो क्षेत्रमा अब्बल बन्ने गरी काम गर्न आग्रह गरेका छन् ।
प्रधानमन्त्री ओलीले भने, ‘अब समय आएको छ । हामीले आत्मविश्वासका साथ यो व्यक्तिगत आत्मविश्वास र व्यक्ति व्यक्तिका आत्मविश्वास मिलाएर राष्ट्रिय आत्मविश्वास यो निर्माण गर्नुपर्नेछ । राष्ट्रिय आत्मविश्वासले हामी देश विकास गर्नसक्छौँ । आ—आफ्ना क्षेत्रमा । कोही पनि मानिस हरेक क्षेत्रका लागि विज्ञ हुन सक्दैन । आफ्नो आफ्नो क्षेत्र हुन्छ । राम्रो खेलाडीलाई खेल्न दियो भने सम्मानित गर्न पाइन्छ । राम्रो शिक्षकहरुलाई पढाउन दियो भने सम्मान गर्न पाइन्छ । शिक्षकलाई खेलमा र खेलाडीलाई शिक्षकमा लगेर हाल्दा सम्मान गर्ने होइन, सम्भावना नै समाप्त हुन्छ । आफ्नो क्षमता हामीले चिन्नुपर्छ ।’
प्रधानमन्त्री ओलीले सबैको आत्मविश्वास, प्रतिभा र मेहनतलाई जोडेर नेपालले तिब्रताका साथ सम्पन्नता हासिल गर्दै मानवीय गुणवत्तामा पनि अग्रता लिने विश्वास व्यक्त गरेका छन् ।
प्रकाशित मिति: २७ श्रावण २०८२, मंगलवार
