१६ श्रावण २०८२, शुक्रबार
काठमाडौँ। नेपाल उद्योग वाणिज्य महासंघका अध्यक्ष चन्द्रप्रसाद ढकालल कोदोजन्य खेतिको प्रवद्र्धन गर्न सरकार र निजी क्षेत्रबीच सहकार्य आवश्यक रहेको बताएका छन् ।
शुक्रवार काठमाडौंमा प्रथम राष्ट्रिय कोदो दिवसको अवसरमा आयोजित कार्यक्रममा बोल्दै उनले यस्तो बताएका हुन् । उनले युवा पलायनको कारण कृषि क्षेत्रमा श्रमको अभाव देखिएको उल्लेख गर्दै सरकारले कृषि खेतितर्फ युवाहरुलाई आकर्षित गर्ने खालको नीति अपनाउन आवश्यक रहेको बताए । उनले कोदो र फापरबाट बनेका परिकारहरूको प्रचार–प्रसार तथा घरेलु उत्पादन प्रवद्र्धनका लागि निजी क्षेत्र तयार रहेको पनि बताए ।
उनले भने, ‘अहिले हाम्रो गाउँतिर खेतियोग्य जमिन बाँझो रहेको अवस्था छ । यस्तो जमिनमा हाम्रो कृषिजन्य कोदो, फापर खेति गर्नुपर्ने आवश्यकता देखिन्छ । अहिले धेरैजसो हाम्रो दाजुभाईहरु बाहिर जाने भएको कारण कृषिखेतिमा कम ध्यान पुगेको हुँदा यसलाई प्रमोट गर्नुपर्ने र सरकारले इन्करेज गर्नुपर्ने देखिन्छ । निजी क्षेत्रको तर्फबाट कोदो र फापरको प्रमोशन तथा यसबाट बनेका परिकारहरुको परिकारको समेत प्रमोशनको लागि र डोमेस्टिक उत्पादनलाई प्रमोट गर्नको लागि तपाईहरुसँग सहकार्य गरेर अगाडि बढ्नेछ भन्ने कुरा म राख्न चाहान्छु । कोदो खेतिलाई प्रवद्र्धन गर्नको लागि यहाँहरुले गर्नुभएको संस्थागत प्रयासको म प्रसंशा पनि गर्न चाहन्छु ।’
सरकारले कोदोजन्य बालीहरुको आयात रोक्न तथा उत्पादनमा बृद्धि गर्न पहिलो पटक यो वर्षदेखि कोदो दिवस मनाउन शुरु गरेको छ ।
प्रकाशित मिति: १६ श्रावण २०८२, शुक्रबार
