१५ श्रावण २०८२, बिहीबार
एजेन्सी। म्याड्रिडको उत्तरपश्चिममा रहेको अविला प्रान्तमा द्रुत गतिमा फैलिरहेको डढेलोसँग लडिरहेका अग्निनियन्त्रकहरूलाई सहयोग गर्न स्पेनको सैन्य आपतकालीन प्रतिक्रिया एकाइ तैनाथ गरिएको छ ।
सोमवार मध्यरातदेखि स्पेनमा डढेलो जारी छ । शुरुमा क्युभास डेल भ्याले नगरपालिका नजिकै आगलागी भएको थियो । नजिकैको मोम्बेलट्रान गाउँतिर द्रुत गतिमा अघि बढेको बताइएको छ । जसले गर्दा ५० जना बासिन्दाहरूलाई खाली गराइएको छ । कास्टिला वाई लियोनको क्षेत्रीय सरकारकाअनुसार विमान, हेलिकप्टर र जमिनका कर्मचारीहरूले आगो नियन्त्रणमा ल्याउन काम गरिरहेका छन् । यस क्षेत्रमा विगतमा पनि यस्तै विनाश देखिएको छ । १६ वर्षअघि भएको डढेलोले ५ हजार हेक्टर जमिन जलाएको थियो । दुई जनाको ज्यान गएको थियो ।
बासिन्दाहरूलाई घरभित्रै बस्न र आधिकारिक निर्देशनहरू पालना गर्न आग्रह गरिएको छ । आगोको कारण अनुसन्धान भइरहेको छ । युरोपेली वन अग्नि सूचना प्रणालीका अनुसार यस वर्ष अहिलेसम्म स्पेनभरि डढेलोले लगभग ३७ जार हेक्टर जमिन जलाएको छ ।
प्रकाशित मिति: १५ श्रावण २०८२, बिहीबार
