२ श्रावण २०८२, शुक्रबार
काठमाडौँ। नेकपा एमालेका सचिव योगेश भट्टराईले पूर्वराष्ट्रपति विद्यादेवी भण्डारीलाई पार्टीमा सम्मानजनक ढंगबाट व्यवस्थापन गर्ने क्षमता एमालेसँग रहेको बताएका छन् ।
सचिवालय बैठकका क्रममा पार्टी केन्द्रिय कार्यालय च्यासलमा सञ्चारकर्मीहरुसँग कुरा गर्दै उनले नेतृ भण्डारीले सार्वजनिक रुपमै एमालेको सदस्यता नविकरण गरेको र पार्टीमा सक्रिय रुपमा राजनीति गर्ने घोषणा गरिसक्नुभएको अवस्थामा पार्टीले यसबारेमा छलफल गरी आवश्यक निर्णय लिने उल्लेख गरेका छन्। पार्टीमा सक्रिय हुने घोषणापछि अब पार्टीले उचित स्थान दिनुपर्ने बताए ।
उनले भने, ‘उहाँले सार्वजनिक ढंगले नै घोषणा गरिसकेपछि अब यो उहाँको व्यक्तिगत विषय मात्रै भएन । यो पार्टीको सार्वजनिक विषय भयो । नेकपा एमालेको राजनीतिमा सक्रिय रुपमा फर्किने घोषणा गरेर आफ्ना सेवा, सुविधा सबै त्यागेर आइसकेपछि पार्टीको मामिला मात्रै भएन । हामी छलफल गर्छौं । उहाँ सक्रिय रुपमा आउनुहुन्छ पार्टीमा उहाँलाई उचित स्थान दिनुपर्छ । उहाँको सम्मानजनक ठाउँ खोज्नुपर्ला । पार्टीको हाइलेभलमा कुराकानी होस् भन्ने हाम्रो चाहना छ । अध्यक्षले कुरा के हो, कसो हो भन्ने स्पष्ट होस् भन्ने चाहना छ । पार्टीमा छलफल गर्छौं । सार्वजनिक विषयलाई लुकाएर, कार्पेट मुनि राखेर हल हुँदैन, त्यो हल गर्नैपर्छ । उहाँको उद्देश्य, गन्तव्य, के चाहनुभएको छ, के का लागि आउन चाहनुभएको छ त्यो भन्नुभएको छैन, पार्टीमा भन्नुहोला । उहाँ जत्तिको मान्छे पार्टीको प्रणालीबाटै जानुहुन्छ । हामी सम्मानजनक ढंगले सेटल गर्छौं । नेकपा एमालेसँग त्यो क्षमता छ । अध्यक्षले पार्टीमा आवश्यक परे छलफल गरौँ भन्नुभएको छ ।’
सचिव भट्टराईले पूर्वराष्ट्रपति भइसकेको र यसअघि पनि पार्टीको उपाध्यक्षसमेत रही सक्नुभएको अवस्थामा पार्टीको प्रणालीबाटै नेतृ भण्डारी अघि बढ्ने कुरामा कुनै शंका नरहेको बताए ।
प्रकाशित मिति: २ श्रावण २०८२, शुक्रबार
