३२ असार २०८२, बुधबार
काठमाडौँ। शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले शिक्षा क्षेत्रमा राजनीति हाबी भएको कारण अवस्था शैक्षिक अस्तव्यस्त बनेको बताएका छन् ।
बुधवार काठमाडौंमा आयेति एक कार्यक्रममा बोल्दै सभापति थापाले यस्तो बताएका हुन् । उनले शिक्षा क्षेत्रमा गुणस्तरीय सुधारको खाका नबनाई सरकारले अन्धाधुन्द निर्णय गर्दै आएको आरोप लगाए । उनले आवेदनकै आधारमा समूदायमा विद्यालयको संख्या थप्ने सरकारको निर्णयले पनि शिक्षामा गुणस्तर आउन नसकेको बताए । उनले शिक्षा, स्वास्थ्य र देश विकासमा कुनै पनि राजनीतिक दलले राजनीति गर्न नहुनेमा जोड दिए । उनले मुलुकको समग्र विद्यालय शिक्षा प्रणालीमा सुधार ल्याउनको लागि विद्यालय शिक्षा विधेयक अघि सारेको पनि बताए । उनले पछिल्लो समय शिक्षा विधेयक शिक्षक विधेयक जस्तो बन्दै गएको टिप्पणी पनि गरे ।
उनले भने, ‘शिक्षा क्षेत्रलाई राज्यले धेरै अगाडी बढाउनुपर्छ भन्ने धारणा राख्यो । तर त्यसको मोडालिटी के हो ? कस्तो गुणस्तर दिएर अगाडि बढ्नुपर्छ भन्ने कुरामा ध्यान दिएन । तलबाट आवेदन आएपछि स्वीकृति दियो । दरबन्दी दिन पर्दैन ? विद्यार्थी छन् कि छैनन् ? राजनीतिक रुपले हामीले शिक्षालाई लथालिंग पारेका छौं । शिक्षा क्षेत्रमा, स्वास्थ्य क्षेत्रमा, देश विकासमा कुनैपनि राजनीतिक दलले राजनीति गर्ने होइन । यसलाई गतिका साथ अगाडि बढाउने वातावरण सिर्जना गर्नुपर्छ । शिक्षाको अवस्था यस्तो अवस्थामा भएपनि यसको सुधारका लागि विद्यालय शिक्षा विधेयक अगाडि बढेको छ । अहिले पनि महासंघको अध्यक्ष यही हुनुहुन्छ । उहाँसँग सबै सहमति हुन्छ, अन्त गएपछि के हुन्छ थाहा छैन । उहाँहरुका धेरे मागहरु हामीले सम्बोधन पनि गरिसकेका छौं । शिक्षा विधेयक नै अहिले शिक्षक विधेयक भएको छ । आज हामी शिक्षकहरुलाई देशभरका विद्यार्थीप्रति उत्तरदायि बनाउन सकियो, शिक्षकका सेवा सुविधाहरु थप्न सकियो भने मात्र विद्यार्थी असल बन्न सक्छ भन्ने हाम्रो समितिको ठहर छ ।’
शिक्षकहरुलाई विद्यार्थीप्रति उत्तरदायी बनाउन सकेमात्र शिक्षा क्षेत्रको सुधार हुने आफ्नो समितिको ठहर रहेको सभापति थापाको भनाइ छ ।
प्रकाशित मिति: ३२ असार २०८२, बुधबार
