२९ असार २०८२, आईतवार
काठमाडौँ। गृहमन्त्री रमेश लेखकले रसुवाको भोटेकोशी नदीको बाढीबाट मृत्यु भएका ११ जनामध्ये दुई जनाको मात्रै सनाखत भएको बताएका छन् ।
राष्ट्रिय सभाअन्तर्गतको सार्वजनिक नीति तथा प्रत्यायोजित विधायन समितिको बैकठमा बोल्दै उनले यस्तो बताएका हुन् । उनका अनुसार बाढीमा २० जना मानिस नेपालबाटै बेपत्ता भएको र अन्य ११ जना चीनको भूमिबाट बेपत्ता भएको र बगेर नेपालमै आएको हुनसक्ने खबर चीन सरकारले दिएको बताए । उनले उनीहरुको पनि खोजि भइरहेको बताए । अहिलेसम्म नेपालबाट बाढीमा परि बेपत्ता भएकामध्ये ११ जनाको शव फेला परेको बताए । विपद्मा परेर बेपत्ता भएको १० दिनसम्म पनि शव नभेटिए मृतक सरह राहत दिने बताए । खोज, उद्धार, पुनःनिर्माणमा पनि सरकार तयारी अवस्थामा रहेको बताए । पूर्वसूचना प्रणालीलाई चुस्त, दुरुस्त बनाएको दाबी गरे ।
उनले भने, ‘अहिलेको स्थिति कस्तो छ भने २० जना मानिस हाम्रै सीमाभित्रबाट बेपत्ता भएको स्थिति देखिन्छ । जसमा मित्रराष्ट्र चीनको नागरिकहरु पनि हुनुहुन्छ । ११ जना जति चीनबाटै मिसिङ भएको खबर गर्नुभएको छ । उहाँहरु पनि बगेर यतै ल्याएको आशंका छ । अहिलेसम्म जम्मा ११ जनाको मात्रै लाश भेटिएको छ । सनाखत दुई जनाको मात्रै भएको छ । कहिले कहिँखोज उद्धार गर्दागर्दै पनि बेपत्ता हुन्छ मानिस भेटिँदैन । त्यसैले हामीले १० दिनसम्म खोज गर्ने, यदी विपद्मा परेर बेपत्ता भएको १० दिनसम्म पनि भेटिएन भने मृतक सरह राहत दिने निर्णय हामीले गरेका छौँ । जीवितै भएपनि केही बिग्रिएन सरकारले सहयोग गर्ने कुरा हो । खोज, उद्धार, पुनःनिर्माणमा पनि हामी तयारी अवस्थामा छौँ । कुनै कमी नगरी काम गर्नेछौँ । पूर्वसूचना प्रणालीलाई चुस्त, दुरुस्त बनाएका छौँ । अब जोखिम उत्पन्न भइहाल्यो भने प्रतिकार्यको कुरा हो । खोज, उद्धार, राहत, पुनःनिर्माणको चरण हुन्छ ।’
सरकारले पूर्वसूचनाका लागि एसएमएसले नपुगेको निष्कर्ष निकाल्दै टेलिफोनको सर्भिस प्रोभाइडरहरुलाई अब घण्टी नै एकै पटक बजाउने र फोन उठाउने वातावरण बनाउनेबारे सोचिरहेको बताए ।
प्रकाशित मिति: २९ असार २०८२, आईतवार
