२० जेष्ठ २०८२, मंगलवार
काठमाडौँ। राष्ट्रिय सभाबाट शहीद दशरथ चन्द स्वास्थ्य विज्ञान विश्वविद्यालय विधेयक, २०८० का सम्बन्धमा प्रतिनिधिबाट भएको संशोधन प्रश्ताव सर्वसम्मतीले स्वीकृत भएको छ ।
मंगलवार बसेको राष्ट्रिय सभा बैठकमा शिक्षा, विज्ञान तथा प्रविधि मन्त्री रघुजी पन्तले पेश गर्नुभएको प्रश्ताव सर्वसम्मतिले स्वीकृत भएको हो । मंगलबारको बैठकमा शिक्षा मन्त्री पन्तले संशोधनसहितको प्रश्तावमा सांसदहरुले उठाएका प्रश्नको जवाफ दिएका हुन् । बैठकमा सांसदहरुले उठाएका प्रश्नको जवाफमा मन्त्री पन्तले विश्वविद्यालयको भौतिक संरचना सम्पन्न भइसकेको र ओभरहेड पानी ट्याङ्की, बहुउद्देश्यीय हल र आन्तरिक सडक निर्माण भइरहेको जानकारी दिए । साथै ट्रिटमेन्ट प्लान्ट, फर्निचर तथा फर्निसिङसम्बन्धी काम चालु आर्थिक वर्षमा सम्पन्न हुने बताए ।
उनले भने, ‘निश्चय पनि यो विश्वविद्यालयले सुदूरपश्चिममामात्र नभई देशको शैक्षिक र स्वास्थ्य क्षेत्रमासमेत महत्वपूर्ण प्रभाव पार्नेछ । नेपालको मेडिकल साइन्स सम्बन्धमा खुलेको यो पहिलो विश्वविद्यालय हो । र, यो देशको पिछडिएको भाग भनेर सधैं चर्चामा आइरहने सुदूरपश्चिममा खुलेको छ । र म आफुपनि के अपेक्षा गर्छु भने कैलाली र कञ्चनपुर हुँदै नेपालका दाजुभाई दिदीबहिनीहरु भारततिर जसरी लर्को लाग्थे अब तिनीहरुको पाइला गेटामा गएर रोकिनेछ । ५१ एक हेक्टरको क्षेत्रफलको जग्गामा पचास वटाभन्दा बढी संरचनाहरु निर्माण भइसकेका छन् । र, हालसम्म ठूला भौतिक संरचना सबै सम्पन्न भइसकेका छन् । जसमा ३९ वटा ठूला भवनहरु रहेका छन् । ओभरहेड पानी ट्याङकी, बहुउद्देश्यीय हल र आन्तरिक सडक निर्माण कार्य भइरहेको छ भने ट्रीटमेन्ट प्लान्ट, फर्निचर तथा फर्निसिङसम्बन्धी काम चालु आर्थिक वर्षमा सम्पन्न हुनेछ । यो विश्वविद्यालयप्रति जुन अपनत्व देखाउनुभएको छ माननीयहरुले त्यहाँ त प्रश्न नै छैन । यो विद्यालय राम्ररी सञ्चालन होस्, राजनीति नहोस्, स्वास्थ्य र शिक्षाको क्षेत्रमा महत्वपूर्ण भूमिका खेलोस् भन्ने जुन सद्भाव र आशा मात्र छ त्यसैले म त्यसप्रति समर्थन व्यक्त गर्न चाहन्छु । तपाईहरुको चिन्ता, चासो र आशाप्रति मेरो पूर्ण समर्थन रहनेछ ।’
उनले विश्वविद्यालय सञ्चानप्रति सांसदहरुको सद्भाव र आशाप्रति आफ्नो पूर्ण समर्थन रहने बताउँदै विश्वविद्यालयले स्वास्थ्य र शिक्षाको क्षेत्रमा महत्वपूर्ण भुमिका खेल्ने स्पष्ट पारे ।
प्रकाशित मिति: २० जेष्ठ २०८२, मंगलवार
