विदेशीएका विद्यार्थीको मानसिकता बुझाउन: ‘कथा र संवाद: मनका लागि यात्रा’

काठमाडौँ। अष्ट्रेलियामा रहेका दक्षिण एसियाली युवाहरूमा तीव्र रूपमा बढ्दो मानसिक स्वास्थ्य समस्यालाई सम्बोधन गर्न, सिड्नीस्थित मिडिया र प्रोडक्सन हाउस Mauri-E ले नयाँ सांस्कृतिक अभियान “Mind Matters: परिवर्तनको लागि सिनेमा” को घोषणा गरेको छ।

यो अभियानले कथा र सिनेमा को उपचारात्मक शक्तिको प्रयोग गर्दै मानसिक स्वास्थ्यसम्बन्धी मौनता तोड्ने प्रयास गर्नेछ। २०२५ को जुन २० देखि सेप्टेम्बर ११ सम्म सञ्चालन हुने यो बहुचरणीय अभियानले आप्रवासी समुदाय — विशेषतः नेपाली अन्तर्राष्ट्रिय विद्यार्थी र युवाहरू — माझ खुला संवादको अवसर सिर्जना गर्ने उद्देश्य लिएको छ।

“मानसिक स्वास्थ्य केवल फुसफुसमा सीमित हुनु हुँदैन। यसलाई अभिव्यक्ति, सहानुभूति र दृश्यता चाहिन्छ,” — सरोज विष्मा बस्नेत, संस्थापक सीईओ तथा क्रिएटिभ डाइरेक्टरले भने, “त्यसैले हामीले फिल्मलाई माध्यमका रूपमा रोजेका हौं।”

कार्यक्रम र समावेशी प्रयासहरू

अभियानअन्तर्गत :

मौलिक सर्ट फिल्महरू,

“दुई संसार बीच: अपेक्षाको अदृश्य दबाब” नामक डकुमेन्ट्री,

अन्तरक्रियात्मक प्यानलहरू,

डिजिटल सामग्रीहरू,

र समुदाय-आधारित कार्यक्रमहरू समावेश हुनेछन्।

यी सबै कार्यक्रम युवाहरूका लागि र उनीहरूको सहकार्यमा निर्माण गरिने बताइएको छ।

अभियानको पहिलो प्रमुख कार्यक्रम “CineCause” को सफ्ट-लन्च २० जुन २०२५ मा सिड्नीको Maya Lounge मा आयोजना हुनेछ। Maya Lounge ले न केवल स्थान उपलब्ध गराएको छ, तर अभियानको दृष्टिकोणलाई खुलेर समर्थन पनि गरेको छ।

“हामी Maya Lounge प्रति अत्यन्तै आभारी छौं। उनीहरूको न्यानो सहयोग र आतिथ्यले यस परिकल्पनालाई वास्तविकता बनाउने मार्ग प्रशस्त गरेको छ,” — अर्पण केशर खनाल, सह-संस्थापक तथा परियोजना प्रमुखले भने।

TEJ-US सर्ट फिल्मको प्रिमियर

उद्घाटन कार्यक्रममा TEJ-US नामक सर्ट फिल्मको प्रिमियर गरिनेछ, जुन Dissociative Identity Disorder (DID) — एक कम छलफल भएको मानसिक अवस्थामाथि आधारित छ। त्यसपछि प्रमुख वक्ताहरूको सम्बोधन र अभियानसँग सम्बन्धित कार्यक्रमहरू तथा मर्चेन्डाइज सार्वजनिक गरिने जनाइएको छ।

नेपालसम्म विस्तार

समुदायको सहभागितालाई केन्द्रमा राखेर डिजाइन गरिएको यो अभियान नेपालसम्म पनि विस्तार गरिनेछ। स्थानीय विद्यालय, कलेज, मिडिया र सांस्कृतिक संस्थाहरूको सहकार्यमा मानसिक स्वास्थ्यका विषयमा चेतना अभिवृद्धि गरिनेछ।

“हामी सिमानाहरू पार गरेर युवाहरूले आफू देखिएको, सुनेको, र साथ पाएको महसुस गरून् भन्ने चाहन्छौं,” — शैल दाहाल, Blueprint Migration का सीईओ तथा अभियान सहयोग कार्यकारीले बताए।

Mauri-E को यो अभियान केवल मानसिक स्वास्थ्यको मौनता तोड्ने मात्र होइन, सांस्कृतिक रूपान्तरण, सहानुभूति निर्माण, र पुस्ता तथा भूगोलबीच पुल निर्माण गर्ने दिशामा महत्वपूर्ण पहल सावित हुने अपेक्षा गरिएको छ