२५ बैशाख २०८२, बिहीबार
काठमाडौँ। राष्ट्रिय प्रजातन्त्र पार्टीका अध्यक्ष राजेन्द्र लिङदेनले गणतन्त्र र धर्मनिरपेक्षताको अन्त्य गरेर राजासहितको प्रजातन्त्र चाहनेबीच ध्रुवीकरण हुन जरुरी रहेको बताएका छन् ।
राजसंस्था पुनःस्थानाका लागि गठित नवराज सुवेदी नेतृत्वको संयुक्त जनआन्दोलन समितिले बिहीवार काठमाडौंमा गरेको पत्रकार सम्मेलनलाई सम्बोधन गर्दै अध्यक्ष लिङदेनले राजसंस्था र हिन्दुराष्ट्रको पक्षमा रहेका अन्य दलका नेता कार्यकतालाई ध्रुवीकरण हुन आह्वान गरेका हुन् । उनले राष्ट्रवादीहरुको आन्दोलन देशका लागि भएकोले सम्पूर्ण देशवासीलाई आन्दोलनमा सहभागी हुन आग्रहसमेत गरेका छन् । अबको आन्दोलन सफल नभएसम्म नरोकिने दाबी गर्दै अध्यक्ष लिङदेनले मुलुक यही अवस्थामा बसिरहन नसक्ने भएकाले अब नयाँ सम्झौतामा जानुपर्ने स्पष्ट पार्दै उनले यदी आफुहरुको प्रश्ताव अस्वीकार गरी गणतन्त्र पक्षधरले दमनको बाटो रोजे उनीहरु बढारिने चेतावनीसमेत दिएका छन् ।
उनले भने, ‘राजसंस्था र हिन्दु राष्ट्रको पुनःस्थापनासहित संघीयता खारेजीको आन्दोलनका लागि वैशाख २५ महत्वपूर्ण दिन हो । गणतन्त्र र धर्मनिरपेक्षताको अन्त्य गरेर राजासहितको प्रजातन्त्र चाहनेबीच ध्रुवीकरण हुनु जरुरी छ । यो आन्दोलन राष्ट्रवादीहरुको आन्दोलन हो यसका लागि सिंगो देशवासीलाई आन्दोलनमा सहभागी हुन आग्रह गर्दछु । अब आन्दोलन सफल नभएसम्म रोकिँदैन । मुलुक यही अवस्थामा बसिरहन सक्दैन, नयाँ सम्झौतामा जानैपर्छ । अब राजादेखि सबै शक्ति अटाउनसक्ने आपूmहरुको प्रस्ताव नस्वीकारे गणतन्त्र पक्षधरहरु बढारिने छन् । अब बल सरकारको कोर्टमा छ । तपाईहरु के चाहनुहुन्छ । देखिरहनुभएको होला केही दिन पहिला सम्पूर्ण राज्यशक्ति प्रयोग गरेर यो आन्दोलनको प्रतिवाद गर्ने अभ्यास पनि गर्नुभयो । दमन र जालझेलको सहारा नलिई समझदारीमा आउन गणतन्त्र पक्षधर दल र सरकारलाई आग्रह गर्छु । राजसंस्थाको कुरा गर्नु भनेको लोकतन्त्रको विरोध गर्नु होइन, उन्नत मुलुकमा राजतन्त्र अहिले पनि छ ।’
अध्यक्ष लिङदेनले अबदेखि राप्रपाका सबै कार्यक्रम आन्दोलनको एउटा अंगको रुपमा अघि बढ्ने घोषणासमेत गरेका छन् ।
प्रकाशित मिति: २५ बैशाख २०८२, बिहीबार
