२३ चैत्र २०८१, शनिबार
काठमाडौँ। प्रधानमन्त्री केपी शर्मा ओलीले भारतीय प्रधानमन्त्री नरेन्द्र मोदी सगरमाथा संवादमा नेपाल नआउने बताएका छन् ।
सगरमाथा संवादको समयमा नै मोदीले युरोपको भ्रमण गर्ने कार्यक्रम तय भइसकेकाले नेपाल आउन नपाउने तर भारतबाट उच्चस्तरको प्रतिनिधि सहभागी हुने जानकारी गराएका छन् । शनिवार थाइल्याण्डको औपचारिक भ्रमण सेकर स्वदेश फर्किएका प्रधानमन्त्री ओलीले त्रिभूवन अन्तर्राष्ट्रिय विमानस्थलमा सञ्चारकर्मीहरुसँगको कुराकानीका क्रममा थाइल्याण्ड भ्रमणमा भारतीय प्रधानमन्त्री मोदीसँग आफ्नो भेट भएको र भेट सुमधुर भएको बताएका छन् । उनले पारस्परिक सहयोगका विभिन्न क्षेत्रहरुको सम्बन्धमा र पञ्चेश्वर आयोजना, व्यापार, दोधारा चाँदनीमा महाकालीबाट सिंचाई गर्ने कुराहरुमा छलफल भएको बताए । नेपाल—भारत सम्बन्धलाई अझ व्यापक विस्तृत, सुदृढ गर्दै लैजाने र देखिएका समस्यालाई तत्काल छलफल गरी टुंग्याउने बारेमा समझदारी भएको बताएका छन् ।
प्रधानमन्त्री ओलीले भने, ‘भारतका प्रधानमन्त्री मोदीजीसँग भेट भयो, श्रीलंकाका प्रधानमन्त्री, भूटान, म्यानमारका प्रधानमन्त्रीसँग पनि भेट भयो । खासगरी भारतीय प्रधानमन्त्रीसँगको भेट कस्तो भयो र के भयो भन्ने चासो छ । भेट अत्यन्तै राम्रो भयो । सुमधुर वातावरणमा मित्रता र हार्दिकताका साथ भेट भयो । यस पल्ट सगरमाथा संवादमा मोदीजी आउन भ्याउनु हुन्न । यसकारण की उहाँको पहिला नै त्यसैबेला युरोप जाने कार्यक्रम जाने तय भइसकेको रहेछ । त्यसलाई बदल्नसक्ने अवस्था नभएकाले उहाँ यहाँ आउन सक्नुहुन्न तर भारतको राम्रै स्तरबाट प्रतिनिधित्व हुन्छ । धेरै लामो होइन, दुई प्रधानमन्त्रीका बीचमा गत सेप्टेम्बरमा हाम्रो कुरा भएको थियो । सेप्टेम्बरमा तपाईंहरुले भनेको जस्तो कुनै नराम्रो भएको होइन । नराम्रो केलाई भन्ने फ्रेण्डली कुराकानी गरेका थियौँ । यसपल्ट त्यस भन्दा बढी राम्रो कुराकानी भयो । पारस्परिक सहयोगका विभिन्न क्षेत्रहरुको सम्बन्धमा हाम्रा लगानीका क्षेत्रहरु, व्यापारका क्षेत्रहरुका सन्दर्भमा र पञ्चेश्वर लगायतका विषयहरु, दोधारा चाँदनीमा महाकालीबाट सिंचाई गर्ने कुराहरु लगायतका कुराहरुमा छलफल भयो । दुई पक्षिय पारस्परिक हितका बारेमा कुराकानी भए । व्यापकै क्षेत्रमा कुराकानी भएको छ । हामीले एउटा अठोट गरेका छौँ, नेपाल—भारत सम्बन्धलाई अझ व्यापक विस्तृत, सुदृढ गर्दै लैजाने र कुनै सानातिना छिमेकमा समस्या देखिन सक्छन्, त्यस्तो तत्काल कुराकानी गर्ने र टुंग्याउने भन्नेकुरा हामीले गहिरो समझदारी गरेका छौँ । यो भेटघाट फलदायी भयो र खुशी छु । उहाँको कुराकानीबाट उहाँ पनि खुशी हुनुहुन्छ भन्ने मैले पाएको छु । भारत भ्रमण असम्भव कुरा थियो र ? कतिपय कारणले नभ्यारहेको स्थितिले मात्रै हो । अवरुद्ध भयो भन्ने जस्तो बाहिर छ त्यस्तो होइन । काँडेतार लगाएको छ र कसैले ? त्यस्तो होइन । ठिकै ढंगले बुझ्दा हुन्छ । हामीले भ्याउँछौँ भन्यौँ भने सगरमाथा संवादअघि भारत भ्रमण हुन पनि सक्छ ।’
प्रधानमन्त्री ओलीले नेपालबाट भारत भ्रमण सगरमाथा संवादका कारण केही व्यस्तता रहेपनि आफूले समय मिलाउनसके हुनसक्ने बताएका छन् ।
प्रकाशित मिति: २३ चैत्र २०८१, शनिबार
