१७ चैत्र २०८१, आईतवार
काठमाडौँ। नेपाली काँग्रेसका महामन्त्री विश्वप्रकाश शर्माले तीनकुने घटनाका मुख्य दोषी पूर्वराजा ज्ञानेन्द्र शाह भएको आरोप लगाएका छन् ।
आईतवार संसद भवन बाहिर पत्रकारहरुसँग कुरा गर्दै उनले राज्यले पूर्वराजालाई संविधानले व्यवस्था गरेको भन्दा बढी सुविधा दिएर राखेकोप्रति पूर्वराजाले गम्भीर भएर सोच्नुपर्ने बताएका छन् । उनले तीनकुने घटनाको सम्पूर्ण जिम्मेवारी पूर्वराजा शाहले लिनुपर्ने जिकिर गरेका छन् । उनले आपराधिक घटनामा मान्छे मारिदा एउटा विज्ञप्ति पनि ननिकालेको भन्दै पूर्वराजाप्रति रोष प्रकट गरेका छन् । उनले राज्यले दिएको सीमालाई नबुझ्ने पूर्वराजालाई पुनः राजा बनाएर केही नागरिकले कस्तो किसिमको राजा खोजेको भन्दै प्रश्न गरेका छन् ।
उनले भने, ‘संसदमा आज हुँर्द गर्दाखेरि सिङ्गो संसद गणतन्त्रको पक्षमा र यो संविधानमा भएको जति एकातर्फ र गणतन्त्रको विपक्षमा छन् वा निर्मल निवासको पक्षमा कोही छन् भने अर्कोतर्फ देखिनुपर्ने अवस्था बन्नुपथ्र्यो । चैत्र १५ गते गम्भीर घटना भएको छ । यो घटनाको नैतिक जिम्मेवारी पूर्वराजाले लिनुपर्छ कि पर्दैन ? मान्छे मारिएको घटनामा बोल्नु पर्छ कि पर्दैन ? कस्तो राक्षशीता खोेजेको हो ? पत्रकार मारिदै गर्दा दुःख लाग्यो भन्ने विज्ञप्तिसम्म कुनै पत्रिकाले छाप्ने गरी पठाउनु पर्छ कि पर्दैन । व्यक्तिको सम्पत्ति लुटिदै गर्दा पूर्वराजालाई दुःख लाग्नु पर्छ कि पर्दैन ? कतिपय नागरिकले कस्तो राजा खोेजेको ? यो घटनामा समग्र रुपमा पूर्वराजा दोषी छन् । पूर्वराजालाई संविधानले प्रदत्त गरेको एउटा नागरिकको हक भन्दा बढी राज्यले दिएर राखेको अवस्था छ । संविधानले नदिएको सुविधा पूर्वराजालाई दिइएको छ त्यो कुरा पूर्वराजाले गम्भीरतापूर्वक सोच्नु पर्दैन ?’
महामन्त्री शर्माले प्रधानमन्त्रीले संसदमा जवाफ दिन तयार भएपनि प्रतिपक्षीहरुले संसद अवरुद्ध गर्नु दुःखद् भएको बताएका छन् ।
प्रकाशित मिति: १७ चैत्र २०८१, आईतवार
