१० माघ २०८१, बिहीबार
काभ्रेपलाञ्चोक । जिल्ला अदालत काभ्रेपलाञ्चोकले साइबर अपराध मुद्दामा एक युवकलाई कैद र जरिवाना गरेको छ। दार्चुलाको मार्मा गाउँपालिका घर भएका महेश सिंह कोट्टारीलाई एक महिना कैद र २० हजार रुपैयाँ पीडित युवतीलाई क्षतिपूर्तिवापत भराउने फैसला भएको हो।
कोट्टारी र पीडित युवतीबीच फोन, म्यासेञ्जरलगायतका सामाजिक सञ्जालबाट कुराकानी हुने गरेको थियो । यसैबीच २६ फागुन २०७९ मा उनी युवतीसँग भेट्न आएका थिए । विवाहको कुरा गर्दा अहिले आफूहरुको बिहे गर्ने बेला भएको छैन भनी युवतीले सम्झाएकी थिइन् । कोट्टारीले नमानेपछि युवतीका अभिभावकले पनि उनलाई सम्झाएका थिए।
तर, कोट्टारीले युवतीको फोटो अर्कै फोटोमा जोडेर, भिडियो कलका स्क्रिनशट, सम्बन्धमा हुँदा लिइएका तस्वीरहरु नक्कली आइडी बनाइ फेसबुकलगायतका सामाजिक सञ्जालमा राखिदिएका थिए। युवतीका आफन्त र साथीहरुलाई पनि उनले ती तस्वीर मेसेञ्जरमा पठाउने गरेका थिए।
साथै कोट्टारीले ती तस्वीर युवतीलाई समेत पठाएकोमा उनले ती सबै हटाउन र जथाभावी नपठाउन आग्रह गरेकी थिइन् । तर उल्टै उनले त्यसवापत युवतीसँग २५ लाख रुपैयाँ मागेको युवतीले दिएको जाहेरीमा उल्लेख छ । साथै परिवारलाई नै सिध्यादिने भन्दै विभिन्न अश्लील मेसेज गरेको उनको भनाइ थियो ।
प्रकाशित मिति: १० माघ २०८१, बिहीबार
