७ माघ २०८१, सोमबार
काठमाडौँ। खो खो विश्वकप उपविजेता नेपाली पुरुष टोलीका कप्तान हेमराज पनेरुले पदक ल्याउने लक्ष्यअनुरूप मेहनत गरेर खेल्दा सफलता प्राप्त भएको बताएका छन् ।
भारतको नयाँ दिल्लीमा भएको खो खो विश्वकपमा उपविजेता बनेको नेपाली महिला र पुरुष टोली सोमबार स्वदेश फर्किएको हो । त्रिभुवन अन्तर्राष्ट्रिय विमानस्थलमा भएको पत्रकार सम्मेलनमा नेपाली पुरुष टोलीका कप्तान हेमराजले विश्वकपमा पदक जित्दै देशको गौरव बढाउन पाउँदा निकै उत्साहित भएको प्रतिक्रिया दिएका छन् । साथै उनले विदाई हुने क्रममा खेलकुद निकायसँग पदक ल्याउन गरेको अठोटअनुरूप मैदानमा खेल्दा सफलता मिलेको बताए ।
संघले गरेको लगानीलाई जसरी पनि पदक ल्याउने खेलाडीको लक्ष्य बन्ने गरेको उनको भनाइ छ । उनले यसअघि नै नेपालले १३ औं साग र एशिया च्याम्पियनसिपमा पनि पदक ल्याइसकेको उल्लेख गरेका छन् ।
उक्त विश्वकपमा नेपालको महिला टोली पनि फाइनलमा भारतसँग पराजित हुँदा उपविजेता सिमित भएको हो । यद्यपि, यो सफलता नेपाली खेलकुदका लागि उच्च र ऐतिहासिक रह्यो । नेपाली महिला खो खो टोलीकी कप्तान सरस्वती कठायतले मैदानमा खेलाडीले एकभएर खेल्दै पदक जित्दा गौरव महशुस भएको उल्लेख गरिन् । प्रशिक्षक र टिम व्यवस्थापकले यो सफलताका लागि धेरै मिहिनत गरेको उनले बताइन् ।
राष्ट्रिय खेलकुद परिषद् (राखेप) का सदस्यसचिव टंकलाल घिसिङले तयारीका क्रममा खो खो संघले पेश गरेको खर्च परिषद्ले स्विकृत गरेको उल्लेख गर्दै आगामी दिनमा पनि आवश्यक लगानी गर्ने प्रतिवद्धता व्यक्त गरे । बाँकी आवश्यक खर्च पनि परिषद्ले बेहोर्न उनको भनाइ छ । साथै उनले खेलकुद परिषद्ले छात्रवृत्ति दिएर रणनीतिक रूपमा तयार गरेको निश्चित खेलमध्ये खो खो पनि रहेको बताएका छन् । अहिले रूपन्दही खो खो खेलको तयारी गरिरहेको र केही खेलाडी राष्ट्रिय टोलीमा अहिले आएको हुनसक्ने बताए ।
उनले पदक जितेपछि खेलाडीले पाउने पुरस्कार खेलकुद विकास नियमावली २०७९ अनुरूप चाडै पाउने बताए । तर त्यसका लागि संघले १५ दिनभित्र नै आवश्यक कागजात पत्र पेश गरे पुरस्कार छिट्टै पाउने उनको भनाइ छ । नेपालमा खो खो खेलको इतिहास धेरै लामो नभए पनि देशलाई विश्वकपमा सफलता दिलाउनुले विशेष बनेको भएको बताए । भारतमा खो खो खेलको इतिहास लामो रहेको र त्यहीअनुरूप उनीहरूको प्रदर्शन रहेको उल्लेख गर्दै नेपाली टोलीले पनि उत्कृष्ट चुनौती दिएको बताए । अब यो सफलता जोगाउने चुनौती पनि हुनसक्ने उनको भनाइ छ ।
नेपाली टोलीका प्रशिक्षक कयामोदिन मन्सुरले करिव एक महिनाको बन्द प्रशिक्षण र तयारीले यो सफलता प्राप्त भएको बताए । साथै उनले खो खो खेलका लागि आवश्यक प्रशिक्षक कमी रहेको उल्लेख गरे । प्रशिक्षक अभावले अभैm राम्रो खेलाडी उत्पादनमा गर्न नसकिएको उनको भनाइ छ ।
नेपाली टोलीका प्रशिक्षका अर्का प्रशिक्षक विकीराज महर्जनले अझै नेपाली खेलाडीले धेरै प्रतियोगिता र तयारी गर्न पाएको भए धेरै राम्रो नतिजा ल्याउनसक्ने उल्लेख गरे । उनले खेलाडीलाई धेरैभन्दा धेरै एक्सपोजर आवश्यक रहेको बताएका छन् ।
पहिलोपल्ट सुरु भएको खो खो विश्वकपमा महिलामा १९ राष्ट्र र पुरुषमा २० राष्ट्रले प्रतिस्पर्धा गरेका थिए । नेपालको महिला टोलीले अपराजित रहँदै फाइनलमा स्थान बनाएको थियो । तर, आइतबार भएको उपाधि भिडन्तमा भारतसँग ७८–४० ले पराजित हुन पुग्यो । पुरुष टोली पनि भारतसँगै ५४–३६ ले पराजित भएको थियो । उक्त टोली सोमवार नेपाल फर्किएको हो ।
नेपाली टोलीलाई युवा तथा खेलकुद मन्त्रालयका सचिव डा.हरि लम्साल, राष्ट्रिय खेलकुद परिषद् (राखेप) का उपाध्यक्ष ध्रुव आचार्य, सदस्यसचिव घिसिङ, राखेपका बोर्डहरू सदस्य अञ्जना श्रेष्ठ मास्के, विना श्रेष्ठ, दीपेन्द्र बिष्ट र भानबहादुर चन्दलगायतले स्वागत गरेका थिए । राखेपले नेपाली टोलीलाई बाजागाजासहित स्वागत गरेको थियो ।
प्रकाशित मिति: ७ माघ २०८१, सोमबार
