२० पुष २०८१, शनिबार
काठमाडौँ । विश्व जलवायु सम्मेलन (कोप २९ ) उपलब्धिमुलक हुन नसकेको भन्दै प्रतिनिधि सभाका सांसदहरुले रोष व्यक्त गरेका छन् ।
प्रतिनिधि सभाको कृषि, सहकारी तथा प्राकृतिक श्रोत समितिले कोप २९ को समीक्षा गर्न आयोजना गरेको छलफलमा सांसदहरुले वन मन्त्रालयका कर्मचारीहरु माथि रोष प्रकट गरेका हुन् । वन मन्त्रालयका कर्मचारीहरुको कारणले कोप २९ भद्रगोल भएको टिप्पणी गरेका छन् ।
सार्वभौम संसदका सदस्यको भुमिकालाई नजरअन्दाज गरेको आरोप उनीहरुको छ । समितिको बैठकमा बोल्दै नेपाली काँग्रेसका सांसद वीरबहादुर बलायरले कोप २९ जस्तो बिजोकको सहभागिता पहिला कहिल्यै नभएको टिप्पणी गरेका छन् ।
राष्ट्रलाई विश्वसामु प्रतिनिधित्व गर्न राजनैतिक नेतृत्व नै आवश्यक रहेको बताए । कोप २९ मा संसदीय समितिको प्रतिनिधित्व नगर्दा अपेक्षाकृत प्रतिफल हाँसिल हुन नसकेको तर्क गरे । उनले वन मन्त्रालयका कर्मचारीहरुले सांसदहरुलाई केही नजान्ने, ज्ञान नभएको (गोज्याङ्ग्रे) जस्तो ठान्ने गरेको आरोप लगाएका छन् ।
कोप सम्मेलनमा राजनैतिक नेतृत्वले खेल्नसक्ने भुमिकालाई समेत वन मन्त्रालयले आझेलमा पारेको बताए । जलवायु सम्मेलन जस्ता सम्मेलनहरु निजी मामिला जस्तो व्यवहार हुन थालेको भन्दै आक्रोश व्यक्त गरेका छन् ।
जलवायु परिवर्तनका असरबिरुद्ध देश आफैँले धेरै गर्नसक्ने अवस्था भएपनि मन्त्रालयले चासो नदिएको आरोप सांसद बलायरका छन् । ठूलाठूला भौतिक संरचना बनउनुअघि गरिने वातावरणीय प्रभाव मूल्यांकनको रिपोर्टलाई वन मन्त्रालयले अनुगमन गर्न नसकेको बताएका छन् ।
रिपोर्ट स्वीकृत गर्ने तर अनुगमन गर्न नजाने गरेको आरोप सांसद बलायरका छन् । वन मन्त्रालयले समितिसँगको सहकार्य बिना काम गर्न नसक्ने भन्दै एक्लै हिँड्ने कोशिस नगर्न चेतावनी दिएका छन् ।
प्रकाशित मिति: २० पुष २०८१, शनिबार
