१९ पुष २०८१, शुक्रबार
काठमाडौ। नेकपा (माओवादी केन्द्र) अध्यक्ष पुष्पकमल दाहालले देशको वर्तमान परिस्थिति जटिल र पेचिलो बन्दै गएको बताएका छन् ।
बिहीवार पार्टी केन्द्रिय कार्यालय पेरिसडाँडामा बसेको पार्टीको स्थायी कमिटीको बैठकमा अध्यक्ष दाहालले देशको वर्तमान परिस्थिति झनै जटिल र पेचिलो बनिरहेको बताएका छन् । बैठकका निर्णयबारे न्युज एजेन्सी नेपालसँगको कुराकानीमा पार्टीका प्रवक्ता एवं उपाध्यक्ष अग्निप्रसाद सापकोटाले अध्यक्ष दाहालको भनाइ उद्धृत गर्दै बैठकमा अध्यक्षले राजनीतिक प्रतिवेदन केन्द्रिय कमिटीको बैठकमा पेश गर्ने निर्णय भएको बताए । उनले बैठकमा अध्यक्ष दाहालले समसामयिक राजनीतिका बारेमा पनि आफ्ना धारणा राख्नुभएको र देशको परिस्थिति झनै जटिल बनिरहेको बताउनुभएको जानकारी दिएका छन् ।
प्रवक्ता सापकोटाले अहिलेको सरकारले आफ्नो नेतृत्वको सरकारले गरेका कामहरु उल्ट्याउने, भ्रष्टाचारी जोगाउने काम गरिरहेको आरोप लगाउदै उनले विद्युत महशुल नतिर्नेहरुको महशुल मिनाह गर्नुपर्ने दबाब प्रधानमन्त्री र उर्जा, जलश्रोत तथा सिंचाईमन्त्रीले दिइरहनुभएको पनि बताएका छन् । उनले आफ्नालाइ जोगाउने र बिरोधीहरु खोजिखोजि कारबाही गर्ने काम भइरहेको बताए । उनले काँग्रेस उपसभापति धनराज गुरुङ र सार्वजनिक लेखा समिति सभापति ऋषिकेस पोखरेलकी श्रीमतीलाई उन्मुक्ति दिइएको आरोप लगाए । उनले राष्ट्रिय जीवनका हरेक क्षेत्रमा हस्तक्षेपले सीमा नाघेको पनि बताए ।
उपाध्यक्ष सापकोटाले त्रिभूवन विश्वविद्यालयका उपकुलपति केशरजंग बराल मंसिर २६ गतेदेखि नै विश्वविद्यालय नगएको बताए । उनले त्रिभूवन विश्वविद्यालयमा पनि दबाब दिने काम हुँदा यो परिस्थिति सिर्जना भएको दाबी गर्दै उनले विश्वविद्यालयको सिनेट बैठक सिंहदरबार बोलाएर कार्यपालिकामा बस्नु गलत भएको बताएका छन् ।
उनले सरकार निरन्तर अधोगतितर्फ उन्मुख भएको बताउदै उनले नेपालीहरुले एक स्वरले नेपाल नेपालीहरुको हो र नेपालीहरुले चलाउनुपर्छ भन्ने आवाज उठाउन जरुरी रहेको बताए । उनले सरकार पूर्ण रुपमा असफल भएको दाबी गरेका छन् ।
प्रकाशित मिति: १९ पुष २०८१, शुक्रबार
