१६ पुष २०८१, मंगलवार
काठमाडौँ । प्रदेश मन्त्रीहरुले बालविवाह अन्त्यका लागि अन्तरक्रिया र गोष्ठी नभई तीन तहका सरकारले जिम्मेवार भएर अभियान सञ्चलान गर्न जरुरी रहेको बताएका छन् ।
मंगलवार ललितपुरमा बालविवाहमुक्त नेपाल अभियान सञ्चालनका लागि आयोजित अन्तरक्रिया कार्यक्रममा बोल्दै प्रदेश मन्त्रीहरुले यस्तो बताएका हुन् । बालविवाह न्युनिकरणका लागि समाजसँग प्रत्यक्ष सरोकार राख्ने स्थानीय सरकारलाई सक्रिय बनाउनुपर्नेमा उनीहरुको जोड छ ।
बालविवाह अन्त्यका लागि सबै तहका सरकारले आ–आफ्नो ठाउँबाट महत्वपूर्ण भुमिका खेल्न जरुरी रहेको प्रदेशमन्त्रीहरुले बताए । कार्यक्रममा बोल्दै कर्णाली प्रदेशका सामाजिक विकासमन्त्री घनश्याम भण्डारीले बाल विवाहको अन्त्यको लागि अन्तरक्रिया नभई अभियानको थालनी गर्नुपर्ने बताएका छन् ।
सामाजमा मानवीयता हराउदै गएको उल्लेख गर्दै उनले समाजलाई लयमा ल्याउन सबैले जिम्मेवार भएर कानूनको अक्षरशः पालना गर्नुपर्ने बताएका छन् ।
उनले भने , ‘हामीले बाल विवाहको लागि अभियानको थालनी गर्ने हो अन्तरक्रिया होइन । मुलुकमा लोकतन्त्र खतरामा छ, मानवीयता हराउँदै गएको छ । यसको लागि म ठिक छु, मेरो व्यवस्था ठिक छ भन्दै कानूनमा उल्लेख गरिएका कुराहरु अक्षरस पालना आफैंबाट गर्नुपर्छ भावना पलाओस् ।’
प्रकाशित मिति: १६ पुष २०८१, मंगलवार
