३० आश्विन २०८१, बुधबार
काठमाडौँ । सरकारको नेतृत्वकर्ता नेकपा (एमाले) ले पार्टीको केन्द्रीय कार्यालय निर्माणका लागि पार्टीका शुभेच्छुक मीनबहादुर गुरुङ र सावित्री गुरुङबाट कीर्तिपुर नगरपालिका वडा नम्बर २, मैत्रीनगरस्थित १० रोपनी १४ आना जग्गा निःशुल्क (दान) प्राप्त भएको जग्गामा कुनै किसिमको लेनादेना नभएको बताएको छ।
पार्टी केन्द्रीय कार्यालय बनाउन भन्दै प्राप्त भएको जग्गाको विषयमा गलत प्रचार भएको भन्दै बुधबार विज्ञप्ति सार्वजनिक गर्दै एमाले केन्द्रीय प्रचार तथा प्रकाश विभाग प्रमुख राजेन्द्र गौतमले यस्तो बताएका हुन् ।
विज्ञप्तिमा भनिएको छ, ‘‘अन्तरमनबाट पारदर्शी र खुला दिलले उहाँले दान गर्नुभएको जग्गालाई हामीले स्वीकार गरेका हौँ। यसमा कुनै किसिमको पनि सौदाबाजी र लेनादेना छैन। उहाँका नाममा विचाराधीन रहेका मुद्दाको बारेमा उहाँ आफैँले फेस गर्ने हो, संविधान, कानुनभन्दा माथि कोही पनि छैन।’’
दान गरेको जग्गा असोज २४ गते बसेको एमाले सचिवालयको ३८ औँ बैठकले संस्थागत रूपमा स्वीकार गरिसकेको विज्ञप्तिमा प्रस्ट पारिएको छ।
प्रकाशित मिति: ३० आश्विन २०८१, बुधबार
