११ चैत्र २०७९, शनिबार
११ चैत्र, काठमाडाैँ । राष्ट्रपति रामचन्द्र पौडेललाई सामुदायिक रेडियो प्रसारक संघका पदाधिकारी तथा कार्यसमितिले सो पदमा निर्वाचित भएकोमा बधाइ तथा सफल कार्यकालको शुभकामना दिएका छन् । राष्ट्रपति भवन शितल निवासमा एक कार्यक्रमका बीच सामुदायिक रेडियो प्रसारक संघका पदाधिकारीले भेटेर बधाई दिएका हुन् ।
सामुदायिक रेडियो प्रसारक संघको प्रतिनिधिलाई सम्बोधन गर्दै सम्माननीय राष्ट्रपति पाैडेलले सामुदायिक रेडियोका कारण गाँउ गाँउसम्म आम नागरिकमा सुचनाको पहुँच पुगेको भन्दै सामुदायिक रेडियोहरुलाई धन्यवाद दिए । साथै स्थानीय उत्पादन र स्थानीय तहमा उत्पादनशिलताको विकास गर्न सामुदायिक रेडियोहरुको भूमिका विशेष रहेको सम्माननीय राष्ट्रपति पाैडेलको धारणा थियो ।
उक्त अवसरमा राष्ट्रपति पाैडेलले भने, ‘स्थानीय उत्पादनलाई प्रोत्साहन गर्नका लागि यहाँहरुको ठूलो भूमिका रहेका छ । त्यही भएकाले स्थानीय तहमा उत्पादनशीलतालाई यहाँहरुले प्रोत्साहन गर्नुभयो भने मुलुकको अर्थतन्त्रमा पनि सहयोग पुग्छ ।’
राष्ट्रपति पाैडेलले नेपालमा श्रमको सम्मान गर्ने संस्कृतिको विकास गनुपर्ने बताए । उनले श्रमले तन र मन दुवै स्वस्थ बनाउने भएकाले यो अपरिहार्य भएपनि अहिले अलिकति पढेपछि काम गर्न हुँदैन भन्ने खालको मनोविज्ञान र धारणा निर्माण भइरहेको बताए । राष्ट्रपति पाैडेलले यो धारणा बदल्न र काम प्रति गर्व गर्न हरेक नागरिक र समुदायमा सूचना र शिक्षा प्रदान गर्न पर्ने सामुदायिक रेडियोको दायित्व भएकोमा जोड दिए ।
उक्त अवसरमा सामुदायिक रेडियो प्रसारक संघको अध्यक्ष अर्जुन गिरीले सम्माननीय राष्ट्रपति ज्यूलाई रेडियो सेट उपहार दिएका थिए ।
प्रकाशित मिति: ११ चैत्र २०७९, शनिबार
